KOMUNIDADE ALDEIA PIPGALAG II HUSU ELETRISIDADE

Husi: Humberto dos Santos

        

MALIANA: Komunidade sira iha aldeia Pipgalag II, durante tinan barak nia laran seidauk asesu ba eletrisidade.

Komunidade sira husi aldeia ne’ebé pertense ba Suku Tapo/Memo, Postu Administrativu Maliana, Munisípiu Bobonaro, husu atu Governo tau-matan orijenti ba sira nia difikuldade ne’e.

Aliende eletrisidade, komunidade sira enfrenta mós problema bee-moos no asesu ba estrada. Komunidade ida, Domingos Martins Ilma hatete, durante ne’e sira enfrenta problema eletrisidade, bee-moos no estrada.

“Tinan barak ona ami seidauk asesu eletrisidade, la’os eletrisidade de’it, maibé estrada, bee-moos,” dehan Domingos iha nia hela fatin, Segunda (02/11/). Dala barak, nia dehan, Membru Governo balun promete atu tau-matan ba eletrisidade, maibé to’o agora seidauk realiza.

Komunidade seluk, Faustina dos Santos, konsidera to’o agora Governo sei abandona sira. “Ami ne’ebé hela iha foho no aldeia to’o agora Governo seidauk tau-matan,” katak nia.

Iha fatin ketak, Honorio Amaral husu ba Ministériu Obras Públika atu hadia lalais estrada, tanba tinan barak sira la asesu ba estrada. “Governo haree mak sidade de’it, area rural nunka atu tau-matan,” nia lamenta.

Jornál Independente, Loron Kinta, 05 Novembru 2015 - Foto: Aldeia Pipgalag II Foho