TL KONTINUA DEPENDENTE SASAN IMPORTASAUN

Timor Leste hanesan nasaun ne’ebe konsumedor dependente maka’as ba sasan importasaun husi nasaun seluk nian.

Diretur Regulasaun Comersial Domingos Guterres hatete, Timor Leste to’o oras ne’e sei depende deit ba sasan importasaun, tanba sasan rai laran ladun tama iha merkadu Internasional, tanba ne’e, numeru exportasaun tun maka’as no importasaun sae ba bei-beik.

“Hau hanoin ita mos halo ona exportasaun produtu rai laran ba iha rai liur, maibe ninia kuantidade maka sei minimu, agora ita exporta deit maka kafe, maibe ita mos iha produtu seluk ne’ebe ita bele halo ona exportasaun ba rai liur, maske ninia kuantidade ne’e ladun bot, maibe ita mos hahu dadauk ona ho prosesu exportasaun ba rai liur, maibe ba nesesidade basiku ita nafatin depende ba rai liur,” dehan Domingos ba Jornalista sira Sesta (30/10/2015) iha Fomento.

Nia mos informa liu tan katak, ba futuru mai MCIA sei servisu hamutuk ho ministeriu relevante, hanesan Ministeriu Agrikultura, oinsa atu kria mos formasaun ruma, atu nun’ee bele atende diak liu tan merkadau sira ne’ebe maka agora presiza hela Timor nia produtu.

Domingos informa mos katak, Governu iha hanoin ida katak, Politika Governu nian maka atu hapara produtu tolu hanesan, masin, bee no kafe atu labele hatama tan mai rai laran. Basaa, Timor Leste mos komesa produs rasik ona.nia

Jornal Nacional