JOVEN TENKE HATUDU HAHALOK HADOMI PAS

Primeira Dama, Isabele Ferreira husu ba joven sira atu hatudu hahalok hadomi pas iha nasaun Timor Leste (TL), tanba TL iha Timor-oan na’in rua mak hetan premio Nobel da Pas hanesan, José Ramos Horta ho Amo Bispo Dom Carlos Filipe Ximenes Belo, husi komunidade internasionál.

“Timor-oan sira iha Nobel da Pas rua, Bispo Belo nomós José Ramos Horta. Sidadaun Timor Leste hotu, li-liu joven sira hanesan futuru nasaun nian, tenke hatudu hahalok hadomi pas,” dehan Isabel Ferreira ba jornalista iha Ministériu Públiku Colmeral Dili, Kuarta (08/06), hafoin hasoru malu ho Prokurador Jeral da Repúblika, José Ximenes.

Primeira Dama, Isabel Ferreira esklarese lia hirak ne’e, relasiona ho ikus-ikus ne’e joven sira tenta atu estraga malu iha tempu kalan.

“Husu ba joven sira, li-liu hanesan futuru nasaun nian, halo nusa mak bele hatene hadomi malu, hahú husi ita nia familia, ita nia komunidade no nasaun,” katak Primeira Dama.

Nia dehan, hadomi pas ne’e signifika katak, hahalok Timor-oan sira nian tenke nakonu ho domin, labele odio malu no hatene perdua ema.

“Tenke hatene perdua ema, hatene halo toleransia ho ema seluk, labele buat hot-hotu tenke baku malu no hanoin at ba malu,” dehan Isabel Ferreira.

Primeira Dama haktuir, joven sira tenke hanoin ba futuru, labele hanoin de’it mak provoka malu no hana malu, tanba futuru Timor Leste iha joven sira nia liman.

Tanba ne’e, Isabel Ferreira husu ba joven Timor Leste tomak atu tu’ur hakamatek iha uma hodi estuda, labele sai husi uma iha tempu kalan, tanba iha tentasaun oi-oin.cos

Jornal Nacional