PM Rui: Governu sei La sosa Saham TT

DILI -  Primeiru Ministru (PM) Rui Maria de Araujo hateten Governu Timor Leste (TL), foti ona desizaun  katak  sei la sosa saham Timor Telekom (TT), tamba governu agora dadauk iha ona saham 21% iha TT.

Lia hirak nee hatoo husi PM Rui, ba jornalista sira, hafoin remata enkontru ho Prezidente Republika (PM), Taur Matan Ruak, iha Palasiu Prezidensial, Aitrak Laran, Dili, kinta (09/06/2016).

Hau informa ba Prezidente konba dezisaun neebe governu foti, atu sosa ka lae, asoes (saham) iha Timor Telekom, Governu halo analiza ekonomika, finanseira ho komersial, too iha konkluzaun katak oras nee dadauk diak liu governu lalika sosa, tamba governu agora dadauk iha asoes 21% iha TT, komu asonista ida seluk hakarak atu faan entau nia oferese ba Governu, governu halo analiza, governu hanoin katak tamba politika ida liberalizasaun ita libealiza ona merkadu iha area telekomunikasoes ninia, diak liu governu la lika sosa, husik ba investedores sira seluk intersadu sosa governu partisipa nafatin hanesan asionista ida e depois halo nia funsaun nafatin hanesan regulador iha seitor ida nee, ” hateten PM Rui.

Iha parte seluk Dosente UNTL Osorio Hornai de Olivera hateten Timor oan lubuk ida maka ninia saham kuda iha TT, tamba nee sira husu ba governu la bele estraga osan hodi sosa tan saham TT nia. Nia hatutan dezenvovimentu iha Munisipiu, Postu Administrativu too Suku, sai problema boot, tamba estrada grave, bee mos la iha, saude la iha, kondisaun eskola la diak, depois agora hanoin maka atu sosa buat sira neebe la benefisiu ba povu. Informasaun kompletu iha STL Jornal no STL Web, edisaun Sesta (10/6/2016). Joao Anibal

Suara Timor Lorosae