Koperativu CPLP defende polítika insentivu ba setór

Prezidente hosi Organizasaun Koperativu sira hosi Komunidade Nasaun sira ho Lian Portugés (CPLP) defende iha loron-tersa ne'e adopsaun ba polítika sira insentivu nian ba koperativizmu entre estadu sira hosi organizasaun, konsidera nia hanesan dalan ida hodi hamenus efeitu sira hosi krizi ekonómiku.

"Koperativizmu hanesan duni dalan estraordináriu ida hodi tulun nasaun sira ne'ebé iha dezenvolvimentu", afirma ona hosi Márcio Lopes de Freita, ne'ebé ko'alia iha Asembleia Jeral hosi Organizasaun Koperativistu sira CPLP nia rohan ne'ebé hala'o iha loron-tersa ne'e iha Maputo.

Prezidente hosi Organizasaun Koperativu sira CPLP nian hatete katak iha momentu sira krizi nian koperativizmu kaer knaar importante ida iha dezenvolvimentu ekonómiku, liuliu iha zona rural sira, ne'ebé okupa barak liu hosi populasaun sira ne'ebé kiak.

Ba Márcio Lopes de Freita, dezafiu prinsipal hosi koperativizmu iha CPLP iha ligasaun ho espansaun, ambisaun ida ne'ebé bele konkretiza de'it ho polítika sira sensibilizasaun nian kona-ba benefísiu sira hosi koperativu nian, liuliu ba nasaun sira ne'ebé iha dezenvolvimentu.

"Bainhira governu sira la atrapalla, koperativu sira evolui", nia hatete no hatutan katak iha kazu barak dirijente sira "atrapalla" tanba ladún iha koñesimentu.

Primeiru-ministru mosambikanu, Agostinho do Rosário, ko'alia durante abertura hosi enkontru, hatete ona katak koperativu entre nasaun sira CPLP nian tenki sai hanesan instrumentu ida ne'ebé bele dinamiza kompetitividade, hodi konsidera potensialidade partikular sira hosi Estadu ida-idak nian.

"Governu mosambikanu promove no fó korajen ba konstituisaun hosi koperativu sira", afirma ona hosi governante, hodi observa katak tenki haree koperativizmu hanesan estratéjia ida hodi hasoru dezafiu ekonómiku sira nasaun nian.

Mosambike iha koperativu hamutuk 35 ne'ebé rejistadu hosi Asosiasaun Mosambikanu ba Promosaun Koperativizmu Modernu nian, grupu ida ne'ebé atua liuliu iha área sira agráriu, kréditu ho resiklajen nian.

Aleinde koperativu oioin hosi CPLP, enkontru iha loron-tersa iha Maputo halibur mós kuadru sira hosi Governu no emprezáriu ki'ik sira hodi ko'alia kona-ba dezafiu sira iha área ne'e iha nível hosi nasaun-membru sira komunidade nian.

SAPO TL ho Lusa