Evita Fallansu Iha Desentralizasaun Harii Uluk Camara Municipio

DILI, (ANTIL) - Eis Casa Sivil Prezidenti Republika, Fidelis Magalhaes konsidera politika desentralizasaun ne’ebe Ministeriu Administrasaun Estatal lansa dadaun ne’e di’ak, maibe atu di’ak liu estebelese uluk mak camara munisipiu duke programa pilotu desentralizasaun.

“Halo mak eleisoens ba minisipiu no fo poder liu tan ba prezidente camara sira, atu nune’e prezidente camara sira bele responsabiliza ba exijensia munisipiu nian para nune’e iha kontrolu politiku husi parte sidadaun nian. Desentraliza maibe la iha legitimidade hanesan de’it. La bele iha defisit ba demokrasia,” Fidelis Magalhaes informa nia hanoin ne’e ba ANTIL, iha Otel Timor, Sesta (02/09/2016).

Tuir Fidelis, politika desentralizasaun ne’e nesesariu tebes, maibe governu tenki identifika ema formadus nain hira iha munisipiu, atu responsabiliza  ba munisipiu sira.

”Tanba sentralizasaun loke mos dalan ba oportunismu, buat ki’ik, bo’ot fo sala de’it ba governu sentral. Kestaun mak ne’e desentraliza ona, maibe presiza mos desentraliza kontrolu ba rekursu atu munisipiu sira bele hola desizaun rasik,” nia dehan.

Dezisaun balun kona ba fundus ba inisiativas dezenvolvimentu mai husi minisipiu, tenke devolve ba minisipios. Haree didiak Ba prosesu oinsa munisipiu sira halo dezisaun ba prioridades dezenvolvimentus rasik.

Liuhosi divulga poder no orsamentu, maski Komisaun Anti Korrupsaun (KAK) bele akompanna ezekusaun para reduz korupsaun iha implementasaun, maibe atu prosesu hirak ne’e bele la’o los tenke halo lalais eleisaun munisipiu atu prezidenti Camara sira bele responsabiliza.

”Para nune iha kontrolo politiku husi parte sidadaun nian. Desentraliza, maibe la iha legitimidade hanesan deit. La bele iha defisit Ba demokrasia,” dehan Fidelis.

Hodi dehan bainhira ba direita iha desentralizasaun no harii instrumentu demokratiku sira hotu no hadia neneik hodi mellora duke hala’o tuir faze agora ne’ebe no fim hanesan de’it tanba sei repete fali siklu prosesu hanesan.

Tuir nia, programa ne’e la presiza halo pilotu, ”Tansa pilotu? La fiar Ba politika desentralizasaun ka? Kuda modo mak halo piloto? Importante liu mak hatene hari karik fundu sustenta kamara sira mai husi neébe, Makina kamara nian boot too iha neébe, Sera que sei fo pezu liu tan Ba fundu Mina rai? Sera que kamaras sei, iha mediu no longo prazo, apoio duni Ba hametin estado e ao mesmo tempo haforsa liu tan ativasaun setores produtivus sira?

Hatan tiha perguntas hirak nee ba diretamente Ba hari kamara munisipio depois desentraliza direitamente. Lalika halo pilotu.” (Jornalista: Manuel Pinto / Editor: Gantry Meilana)

Foto: Fidelis Magalhães