DILI,
(ANTIL)- Dili Weekend Market (DWM ) ne’ebé hahú husi loron
sesta to’o domingu, kada semana, fó satisfasaun ba grupu ki’ik sira ne’ebé
partisipa iha feira ne’e, tanba lokaliza iha fatin estratéjiku.
Maski
grupu sira kontente ho programa Ministériu Komérsiu Indústria no Ambiente
(MKIA), sira husu nafatin atu ministériu haree kona-ba tenda ne’ebé fó ba
sira, tanba difisil atu uza iha tempu uda.
Lúcia
Rodrigues, Grupu Halibur Hamutuk husi Maubara, hateten, tenda ne’e maski nakles
maibé di’ak hodi bele utiliza.
“Tanba besik udan ona, ami husu ba Governu fó tenda boot para ami uza.
Meza mós laiha, ami rasik mak buka tripleks hodi tutan ba tutan. Ami pasiénsia,
tanba moris mak ne’e ona”, Lúcia hateten.
Vendedór
sira mós husu atu dada eletrisidade, atu bele iha naroman. Nune’e,
atividade ne’ebé durante ne’e remata iha tuku neen, bele to’o tuku hitu
ka ualu kalan.
Joana
Guterres, husi Grupu Malubai, Baukau mós akresenta ,fatin ne’ebé uza ba feira
ne’e di’ak. Tanba turista bá vizita no ema sempre bá sosa produtu sira.
“Ami
gosta fatin ne’e. Atu muda bá fatin seluk, ami lakohi. Tanba ida ne’e mak ami
sente di’ak no ema nia la’o fatin mak ne’e”, nia dehan.
Liuhusi
atividade DWM ne’ebé lokaliza iha Casa Europa nia oin, besik Palásiu Governu,
tuir grupu sira, durante loron tolu, bele hetan lukru husi fa’an produtu lokál
kuaze US$ 200 to’o US $ 300. (Jornalista : Maria Auxiliadora/Editór:
Otelio Ote)
Foto:
Vendedor sira iha Dili Weekend Markat
TA Kuresaun titulu ba tetun: "Vendedor Dili weekend market..." (ANTIL) lahia disionáriu tetun.
Sem comentários:
Enviar um comentário