DILI,
(ANTIL) – Eis Prezidente Repúblika, José Ramos Horta konkorda ona atu
lansa fila fali korrida bisikleta MTB (Mountain Bike) multidia ne’ebé nia rasik
inísia ona iha 2009 no mós inisiativa kreativa sira seluk kona-ba páz ho
objetivu atu kontinua promove kultura ba páz no non-violénsia iha Timor-Leste.
Tuir
komunikadu ba imprensa ofisiál hosi Sekretariadu Tour de Timor, ne’ebé ANTIL asesu
iha Segunda, (7/11) katak, eis Premiadu Nobel da Páz konkorda hodi lansa fila
fali MTB ne’e hafoin konsulta ho Primeiru-Ministru, Rui Maria Araújo.
“Ita
hahú eventu ida ne’e iha 2009 nu’udar parte ida hosi kampaña Dili Sidade da
Páz. Tour de Timor iha potensialidade boot tebes atu hatudu Timor-Leste ninia
natureza ne’ebé furak ho ninia ema ne´ebé sempre ho laran ksolok simu bainaka
sira. Ba edisaun 2017 Ita konvida espesialmente kompetedores sira husi nasaun
sira iha Ázia tanba, tema ba 2017 maka “Ponte ba Páz Timor-Leste –ASEAN. Ida
ne’e ha’u nia determinasaun katak Tour de Timor tinan oin sei di’ak liu esforsu
hotu-hotu ne’ebé hala’o tiha ona no hakarak ida ne’e sei sai hanesan siklizmu
ida ne’ebé di’ak liu”, Ramos Horta informa iha komunikadu imprensa.
Tuir
Horta, Tour de Timor 2017 sei sai hanesan rute ida ne’ebé nakonu ho dezafiu
kompara ho korrida sira uluk tanba, korrida ne’e sei liuhusi foho a’as no furak
hirak iha rejiaun sentrál no oeste iha Timor-Leste. Siklista sira sei hean sa’e
ba foho a’as sira metru 10,000 ou liu durante loron lima nia laran ho distansia
kuaze 100 km/lor-loron.
Atensaun
espesiál ne’ebé sei dedika iha 2017 maka ba infrastrutura korrida nian no
organizasaun, atu bele simu siklista, voluntáriu sira no mídia barak liu-tan
atu partisipa.
Korida
ida ne’e sei hala’o iha 19-23 Setembru 2017 no hein katak kuaze siklista na’in
400 maka sei halai hamutuk iha korrida mountain bike ne’ebé la kle’ur
tan sei sai hanesan korrida ida ne’ebé di’ak liu (no lukrativu) iha Ázia.
Aleinde
ne’e, sei iha mós “Korrida ba Paz” (korrida badak ka siklizmu non-kompetitivu
ne´ebé sei involve estudante no partispante sira) ne’ebé sei hala’o iha 16
Setembru 2017 iha kapitál Dili. (jornalista: Xisto Freitas; editora: Rita
Almeida)
Foto:
Eventu Tour de Timor 2016. Imajen dok. Sekretariadu Tour de Timor
Sem comentários:
Enviar um comentário