Implementasuan
programa saude familia iha munisipio Ermera atinji ona 100%, tanba populasuan
hotu iha munisipio ne’e hetan ona asistensia saude liu husi programa ne’e
Diretor
Saude munisipio Ermera, doutor Herculano Seixas hateten populasaun sira 100%
hetan ona vizita husi pesoal saude no registadu iha sistema digitalizasaun hodi
hafasil medikus atu halo kontrolu ba familia sira ne’ebe ho moras.
Nia dehan, munisipio Ermera iha nia habitantes hamutuk 127 mil no uma kain 29059 ne’ebe kobre hotu ona.
“Obstaklu ida mak geografia (distansia) komunidade hela do-dook malu, maibe ami iha mekanismu ida atu kobre sira hotu liu husi klinika movel,” nia hateten bainhira tuir enkontru iha Ministerio Saude Kaikoli, Dili.
Nia dehan, iha vizita ne’e sira mos identifika moras barak hanesan moras
tubercolouse, moras mental, epilepsia (bibi maten) no seluk tan.
Iha tinan 2016, governu implementa programa saude da familia iha teritorio tomak, ho objetivu atu hakbesik asistensia saude ba iha populasaun no halo registu ba sira ne’ebe saudavel, risku ba moras, moras no aleizado atu governu bele fo asistensia diak liu tan ba sira.
Enkuantu, Diretora Saude munisipio Dili, Agustinha da Costa Seguerado hateten Dili foin atinji 80%. Populasaun iha 20% mak seidauk hetan vizita husi ekipa pesoal saude no registu iha sistema tanba komunidade laiha uma.
“Maioria ema rejeita ekipa pesoal saude sira atu vizita no dala ruma uma taka hela, balun pembantu deit mak iha, entaun obstaklu sira ne’e halo ita labele atinji 100%,” nia hateten.
Nia hateten, Dili hanesan capital nasaun ho numeru populasaun ne’ebe bo’ot ne’ebe mai ho antesedensia oi-oin inklui mos ema estrangeirus ne’ebe hela provizorio, presiza tempu atu konsolida sira hodi partisipa iha programa governu nian.
Maibe, nia dehan saude Dili sei esforsu maka’as no buka mekanizmu seluk hodi bele kobre populasaun tomak iha sidade laran hanesan mos munisipio sira seluk.
Paulina
Quintão | The Dili Weekly
Sem comentários:
Enviar um comentário