Prezidente mexikanu agradese "solidariedade ho apoiu"

Iha loron-sesta ne'e, Prezidente mexikanu, Enrique Peña Nieto, agradese ona "solidariedade ho apoiu" hosi "nasaun belun sira" hafoin rai-nakdoko maka'as ne'ebé maka doko Méxiko iha loron-kinta kalan, ho balansu provizóriu ida ba vítima mortal na'in 37 no ema na'in 200 resin kanek.

Liuhosi rede sosial ‘Twitter’, xefe Estadu mexikanu refere ona ba apoiu internasional no hatete katak estadu sira Chiapas ho Oaxaca maka hanesan afetadu tebes tanba rai-nakdoko ida ne'ebé to'o magnitude 8,2 eskala Richter.

"Tuir relatóriu ikus, ho triste tebes maka ema na'in 30 resin mate no na'in 200 resin kanek iha rai-nakdoko ne'e", nia afirma ona.

Aleinde ONG oioin, operasaun sira hodi salva ema halo mós hosi Protesaun Sivil, Ministériu Defeza, polísia federal no dependénsia tomak hosi Governu.

Tuir autoridade lokal sira, rai-nakdoko, ne'ebé nia episentru lokaliza iha kosta estadu Chiapas (iha súl) nia oin, halo ona pelumenus ema na'in 37 mate, na'in 25 iha Oaxaca, na'in sia iha Chiapas no na'in tolu iha Tabasco.

Peña Nieto indika ona katak aeroportu sira no portu sira funsiona hanesan baibain, sei avalia estadu hosi rede rodoviáriu nian.

Tuir Serbisu sismolójiku nasional Méxiko nian, rejista ona total ida hosi réplika hamutuk 266 iha oras sanulu hafoin rai-nakdoko, ida ne'ebé tuir rejistu sira hanesan rai-nakdoko maka'as liu, senti iha kuaze metade hosi nasaun, no mós afeta parte barak Amérika sentral nian.

"To'o tuku 10:15 [oras lokal] rejista ona réplika rai-nakdoko hamutuk 266 iha kosta sira Chiapas nian", refere hosi sentru sismolójiku.

Tuir informasaun hosi organizmu ne'e, depende hosi Institutu jeofíziku hosi Universidade nasional autónomu Méxiko nian (UNAM), réplika ne'ebé maka'as liu iha magnitude ida ho 6,1.

SAPO TL ho Lusa | Foto@ Pedro Rasgado /EPA