Prezidente
Xina nian, Xi Jinping, ho nia homólogu fransés, Emmanuel Macron, konkorda ona
iha loron-sesta ne'e atu komunidade internasional tenki aumenta presaun hasoru
rejimi norte-koreanu, hodi evita "aumentu perigozu" ida ba tensaun
sira.
Fonte
sira Governu fransés hatete ona katak Macron ko'alia ho Xi liuhosi telefone,
hodi hanoin iha "knaar importante no influénsia Pekin nian iha krizi"
norte-koreanu, no ne'ebé maka xefe Estadu na'in rua ne'e mantén nafatin
konversa maka'as kona-ba kestaun ne'e.
Koreia-Norte
hala'o ona iha loron-domingu liubá teste nuklear boot. Seul fó sai ona katak
nasaun prepara hela hodi koko misil foun interkontinental ida.
Xi
ho Macron konkorda ona katak situasaun "husu presaun foun hosi komunidade
internasional hodi halo Pyongyang bele negosia no evita aumentu perigozu sira
tensaun nian".
Líder
na'in rua afirma fali vontade hamutuk hodi mantén "kontaktu besik
ida".
Ministru
xinés Negósiu Estranjeiru nian, Wang Yi, hatete ona iha loron-kinta ne'e katak
Pekin sei apoia medida foun sira hasoru Koreia-Norte.
Maibé,
Wang hatete katak objetivu maka tenki fila fali ba "diálogu no negosiasaun
sira".
Xina
ho Fransa hanesan nasaun rua ho direitu veto iha Konsellu Seguransa ONU nian.
Proposta
norte-amerikanu ba ronda foun ida kastigu nian inklui proibisaun ba esportasaun
petróleu nian ba Koreia-Norte. Xina hanesan responsável ba 80% hosi esportasaun
sira ne'e.
Pekin
lakohi rejimi norte-koreanu lakon, tanba tauk krizi refujiadu ida nian iha nia
teritóriu no península koreanu ida ne'ebé reunifika hosi Koreia-Súl, nasaun
aliadu Estadus Unidus nian.
SAPO
TL ho Lusa
Sem comentários:
Enviar um comentário