Vitima 30 Hela Uma Mahon

DILI - Focupers kria uma Mahon ba vitima neebe hetan violensia domestika hodi hela, tanba nee kada fulan vitima nain 30 too 35 mak hela iha fatin refere, para nunee bele asegura sira nia aan.

“Uma Mahon focupers nian hahu loke hahu kedas iha 1998, antes de independensia too agora. Vitima neebe asesu ba uma Mahon nee, liu ona rihun haat.  Agora kada fulan iha tinan 2017 vitima neebe hela iha uma Mahon nee husi 30 0 too 35 inklui labarik sira,” hateten Diretora Focupers Marilia Da Silva Alves iha nia knar fatin, Focupers, Tersa, (22/08/2017).

Nia sublinha tan, vitima hirak neebe hela iha uma Mahon, mai husi problema violensia domestika, violensia seksual no insestu abuzu seksual.  Hela iha sira nia hela fatin, sira la sente seguru tanba hetan ameasa, no sira hela iha uma Mahon temporareamente, atu hetan asistensia no akompana sira ba iha prosesu.

Tuir regulamentu neebe iha, vitima sira nee sei hela masimu liu fulan neen, maibe iha realidade sira hela too tinan ida. Tanba prosesu ba kazu neebe kleur, vitima balu ba hela lalais deit, hanesan iha semana ida ka rua nia laran.

Silva relata, atendementu ba vitima sira nee, atu fo konsolamentu ba sira iha grupu no individual. No hakbiit sira nia abilidade moris.  Aprende komputador no treinu vokasional sira nee, no mos halo rekoperasaun ba trauma, no iha horariu atu halao atividade ho sira. No kada fulan kazu neebe tama iha focupers, 20 too 25.

Iha fatin seluk, Feto Potensial Amelia Eustakia Pires hateten, vitima neebe hasoru problema iha nia moris, labele moe atu hato ba organizasaun neebe iha.

“Feto sempre hasoru problema oin oin iha ita nia moris. Ita labele moe atu klarifika saida maka akontese mai ita, tanba iha ona organizasaun balu hamrik atu apoia ita, no asegura ita iha problema nia laran,” esplika Amelia.

Nia informa, feto neebe tauk atu hatoo keisa, bainhira hasoru problema, nia nafatin sai vitima ba nia aan rasik. Koko hatoo problema neebe iha, ba feto maluk sira atu bele hetan solusaun.

Terezinha De Deus | Suara Timor Lorosae