PR Lú Olo Husu Diplomata Tenke Halo Knar Reprezenta Nasaun

DILI - Prezidente Republika (PR) Francisco Guterres Lú Olo husu ba diplomata neebe maka estadu fo fiar, tenke halo servisu nudar ema diplomata hodi reprejenta nasaun no povu iha ema nia rai.

“knar diplomata nee nudar missaun neebe maka todan liu husi hau nudar Prezidente Republika fo ba ita sira neebe ema diplomatiku, hodi representa estadu no povu nee halo servisu diak, hodi bele lori imajen neebe diak ba povu no nasaun ida nee,” dehan PR Francisco Guterrs Lú Olo iha nia deskursu seremonia tomada de pose ba embaixador foun Timor-Leste nia ba Filipina Jose Gaspar dos Reis Piedade, iha plasiu Prezidensial Bairo Pite, Sesta (6/10/2017).

Xefe estadu nee dehan tamba nee maka ohin dala ida tan nia parte fo konfiansa ba iha sidadaun ida liu husi Jose Gaspar dos Reis Piedade, asumi knar nudar embaixador Timor-Leste ba Filipina.

Nia dehan maske knar ho misaun neebe maka nia atribui ba Jose Gaspar nee todan maibe nia fiar sei lori povu nia naran kumpri misaun ida nee ho dignidade hodi fo onra boot tebes ba povu iha nasaun foun nee.

Iha fatin hanesan Jose Gaspar dos Reis Piedade neebe maka hetan fiar husi Prezidente Republika Representa nasaun Timor-Leste iha Filipina hateten nia parte sente orgullu ba knar neebe maka Prezidente Republika atribui ona ba nia. 

Natalino Costa | Suara Timor Lorosae