Destituisaun P-PN Ba Tribunal, AMP Simu Ona Karta Notifikasaun Husi Tribunal

DILI – Relasiona karta destituisaun neebe Aliansa Maioria Parlamentar (AMP), hatoo ba Prezidente Parlamentu Nasional (PPN), hafoin P-PN lori prosesu ba iha tribunal. Oras nee dadaun AMP simu ona karta Notifikasaun husi tribunal, tanba nee AMP sei responde tuir tempu neebe iha.

Inforamsaun nee hatoo husi Deputadu Bankada Khunto Jose Agustinho da Silva hatete, karta destituisaun nee nudar proposta destituisaun ba P-PN, maibe seidauk iha desizaun plenaria, P-PN lori ba fali iha Tribunal.

“Ho asuntu ida nee tribunal rekursu fo ona karta notifikasaun ba AMP, iha semana kotuk nee, nia prazu nee mak 10 dias para ami responde, ba karta nee,” katak Jose ba STL Sesta (22/12/2017) iha PN.

Nia hatete, ho destituisaun neebe P-PN hatoo iha tribunal, no tribunal fo ona notifikasaun ba AMP iha semana kotuk ba nee, ho prazu 10 dias, nee espera too loron nee bloku AMP sei responde.

Nunee mos Xefe Bankada PLP Fidelis Magalhaes hatete, relasiona karta destituisaun AMP simu ona karta notifikasaun husi Tribunal, sei estuda didiak depois mak responde, ou iha proivu legal mak tenke kumpri, maibe fiar katak desizaun husi P-PN atu haruka ba Tribunal, laiha baze legal.

Entretantu Xefe Bankada Fretilin Francisco Branco hatete, kona ba Tribunal fo ona karta notifikasaun ba AMP relasiona ho karta destituisaun nee normal. Tanba nee prosedimentu normal husi tribunal, pesoa aprezenta nia razaun, i husi parte neebe hatoo destituisaun nee atu aprezenta mos sira nia argumentu. 

Guilhermina Franco | Suara Timor Lorosae