PR KONTENTI POVU PREOKUPA NIA KLAMAR

Prezidente Repúblika (PR), Taur Matan Ruak, kontenti ho povu Ailelo, Postu Administrativu Hatulia, Munisípiu Ermera nia preokupasaun kona ba sira nia klamar.

PR, Taur hato’o lia hirak ne’e hodi responde ba Abrão Boromeu, komunidade Suku Ailelo, nia preokupasaun husu PR nia apoiu fundus ba sira hodi hadia sira nia kapela ne’ebe agora kontrusaun to’o ona 50 %, atu kontinua tan kbiit la to’o.

PR Taur hatete katak, igreja maka fatin ida ne’ebe povu hela bainhira nasaun hasoru situasaun susar. Maibé buat hotu bele apoiu ida por ida no sei presiza tempu.

“ Pedidu ida ne’e barak, suku ne’ebé ha’u liu sira sempre husu, ha’u kontenti tanba hatudu katak la’os de’it ita prekupa kona ba vida moris nian de’it, maibé ita prekupa mos ona ba ita nia klamar no espeiritualidade. So ke ita nia Estadu sedauk iha kbi’it atu tau matan ba buat hotu. Maibé Estadu ho Igreja servisu hamutuk di’ak no kapas los,”hatete PR Taur, Tersa (27/05), wainhira halao dialogu ho komunidade sede Suku Ailelo.

“ Koopersaun Estadu ho igreja ne’e aliadu ida, katak ha’u mate mos ho ó moris mos ho ó. la hanesan ho parsieru, situasaun ita nia konstrusaun Estadu papel importante. No igreja papel iha tempu rezisténsia iha tempu ne’ebé defisil, sira maka sai ita nia mahan no fatin ne’ebé ita subar, entaun konstituisaun rekonhese no husu ita nia Estadu no Povu servisu hamutuk nafatin Igreja,” Taur Matan Ruak, hatete.

Alende ne’e nia informa mos katak, tinan Governu aloka 1.5 milloens ba kada Dioaeze, hamutuk 4.5 miloens ba Dioseze tolu ne’e (Baucau, Dili, no Maliana), alende Katedral ne’ebe iha Estadu mos fó. Mesmu eskola no klinika barak sei presiza maibé Igreza tenki tau atensaun tanba halo parte iha funu.

“Mesmu ita halo buat ida dala ida labele, maibé neneik-neneik ita sei bele. Iha Ministeriu Gabinete Primeiru Ministru nian, iha departementu ida naran sosiedade civil, ne’ebé bele simu proposta apoiu ba Igreza,”dehan PR Taur.Nev

Jornal Nacional