Trajédia iha Mekah: Ema na'in 700 mate no na'in 805 kanek

Hanesan enkontru anuál ba musulmanu iha mundu tomak. Tanba razaun nebe seidauk hatene, peregrinu sira hahú halai arbiru no sama malu. Hala'o daudaun operasaun tulun nian.

Pelumenus peregrinu na'in 714 mate iha loron-kinta ne'e besik Mekah, iha Arábia Saudita, tanba sama malu nebe akontese bainhira ema millaun resin hahú halai ba Vale Mina nian.

Númeru hosi ema sira nebe kanek aumenta liu 800 resin, haktuir hosi deklarasaun foun hosi serbisu protesaun sivil saudita nian. Nune'e, númeru hosi vítima sira hosi akontesimentu trájiku ne'e liu ona na'in 1.500.

Operasaun tulun nian hala'o daudaun no buat hotu hatudu katak númeru hosi vítima sira sei aumenta. Kontajen dahuluk sira aponta ba na'in 150 mate maibé númeru ne'e aumenta beibeik ho atualizasaun hosi ajénsia internasionál sira.

Seidauk hatene motivu nebe halo ema halai arbiru iha Mina, nebe hala'o tiha ona obra iha tinan hirak ikus ne'e hodi fasilita movimentasaun sira.

Iha tinan 1990, peregrinu na'in mate iha asidente ida iha Mekah iha rituál hanesan "tuda fatuk ba Satanás". Iha insidente ne'e, iha tinan 25 liubá, peregrinu millaun resin la'o iha túnel al-Muaissem nia laran, iha zona nebe akontese insidente iha loron-kinta ne'e.

Hahú iha loron-tersa ne'e maka akontese enkontru anuál boot musulmanu nian iha mundu, ho ema musulmanu millaun atus resin maka ba Vale Mina hodi halo peregrinasaun nebe dura loron neen.

Tinan ne'e, peregrinasaun ba sidade santu Mekah marka ho trajédia iha nebe akontese iha loron sanulu liubá, hafoin asidente ida ho grua, nebe monu iha meskita boot ida nia laran iha Mekah no halo ema na'in 107 mate no kanek na'in 238.

Autoridade saudita sira haruka ona polísia rihun 100 no hasa'e ona nível alerta iha provínsia Mekah tomak. Hamutuk ho peregrinasaun ne'e sei akontese funu Arábia Saudita nian iha Iémen no violénsia jihadista nebe aumenta iha nasaun musulmanu balun.

Rituál fatuk sira nian

Iha loron dahuluk festa Adha nian (Festa Sakrifísiu nian), peregrinu millaun rua resin, haktuir hosi estatístiku nebe fó sai iha loron-kuarta, hahú iha loron-kinta rituál "tuda fatuk ba Satanás" iha Vale Mina, iha oeste Arábia Saudita nian.

Iha rituál ne'e tenki tuda fatuk hitu iha loron dahuluk Idul Adha nian hasoru koluna boot ida nebe reprezenta Diabu, no fatuk 21 seluk iha loron tuirmai ka iha loron rua seluk nebe tuda hasoru koluna tolu (boot, médiu no ki'ik) nebe hamriik iha sidade lulik Mekah. Iha loron-kinta ne'e, koluna sira ne'e substitui ho parede sira.

Antes hahú peregrinasaun ka "haji", iha loron 10 liubá, grua ida monu iha meskita boot ida nia laran iha Mekah, halo ema na'in 109 mate no kanek na'in 400.

Peregrinasaun akontese entre pilár lima islamizmu nian no musulmanu sira tenki halo pelumenus dala ida iha sira nia moris.

SAPO TL ho Renascença