“Mate Netik” Fó-Án Ba Serbisu

Ukun rasik-án ema barak goza “haksolok” no goza lalehan. Ukun rasik-án ema balun gosta goza “terus” maibé haksolok iha infernu laran. Hirak ne’ebé goza “haksolok”, serbisu hodi goza ukun rasik-án ne’e atu manan no haloot osan atu sai riku. Hirak seluk ne’eé goza “terus”, hanesan moris iha infernu laran dedika-án tomak ba serbisu hodi liberta povu la manan doit metan ida.

Hisik kosar hodi liberta povu. Hisik domin hodi serbisu ba rai lulik Timor-Leste. Hisik forsa hodi hadia rai moris fatin ho meus serbisu voluntariumente. Ho filozofia “Cogito Ergo Sum” (Ha’u Hanoin Maka Ha’u Iha), Lacló oan Agusto “Mate Netik” Correia, tinan 43, durante hala’o nia knaar nu’udar Prezidente Konsellu Juventude Postu Administrativu Laclo (PCJPAL) hahú hosi 2007-2015 nunka hetan saláriu ruma maibé nia fó-án tomak ba serbisu hodi liberta povu Laclo hosi mukit.

“Iha Postu Administrativu Lacló, ha’u maka sai hanesan Prezidenti Konsellu Juventude Postu Administrativu Laclo (PCJPAL) maibé lasimu saláriu. Voluntariu de’it durante tinan hitu (7) ona hahú iha tinan 2007 to’o ohin loron,” dehan Agusto Correia ba Matadalan iha Laclo, Sabadu (19/12/2015).

Maske lasimu doit metan ida (osan) maibé ho espiritu ativista ne’ebé nia iha, nia argumenta katak liberta patria ita atinji ona maibé ita laiha espiritu luta atu liberta povu hosi tauk ida mukit nian. Tanba ne’e, nu’udar timoroan, nia hakarak luta no kontribui nafatin nia-án ba rai ida ne’e liu-hosi atividade juventude nian hanesan formasaun area edukasaun, desportu no seluk tan.

“Ha’u halo atividade juventude nian entaun ha’u uza ha’u nia osan professor nian. Tanba ha’u husu ba administrador sira dehan osan laiha entaun ita halo oinsa. Pasiensia, uza de’it osan privadu ne’ebé ha’u iha,” dehan “Mate Netik” ne’ebé akaba ninia eskola iha Eskola Sekundaria São Pedro Comoro-Dili (1996) ne’e ho neon triste.

Nia antesidensia funu hanesan ativista ne’ebé involve iha organizasaun membru 12 Novembru, Renetil, Uner Tuba Rai Metin no mós Immpetu Bandung iha tinan 1991 to’o 1994. Nia halao atividade ativismu ne’e lao ho lema “Lebih baik hilang gelar dari pada hilang tanah air”. Tanba konsikuensia funu, nia lakonsege ramata ninia estudu iha universidade Bandung-Indonézia hodi fila hikas mai iha Timor-Leste.

Iha Laclo, nia la’os asumi kna’ar nu’udar prezidenti CJPAL ne’e de’it, nia asumi mós kna’ar hanesan profesor no mós fundadór ba Eskola Pre-Sekundaria 5 de Maiu Laclo. Eskola ne’e hari’i iha tinan 1999 no nia hanorin kedan iha momentu ne’eba to’o ohin loron. Razaun tau naran “5 de Maiu”, nia dehan, tanba fatin ne’e sai sentru votasaun inklui akordu tripartial entre Indonesia, Portugal no Timor ne’ebé hamosu amkordu 5 de Maiu iha Nova Yorke.

Alende nia sai Fundador ba “Eskola 5 de Maiu Laclo”, oras ne’e, nia mós ramata ona nia estudu baixarelatu Deparatementu Fizika iha Universidade Nasionál Timor Lorosa’e (UNTL) no mós agora daudaun kontinua eskola iha UNDIL foti area Relasaun Internasional no agora hakerek hela monografia.

“Ha’u nia mensajen ba juventude sira maka ne’e; Mai partisipa bá (!) iha prosesu dezenvolvimentu liu-hosi krítika, tanba krítika ne’e buat ida normal maibé presiza ita hadia no partisipa. Se la partisipa ne’e, hanesan de’it,” nia dehan ho espiritu be lakan hanesan ahi-tronku. (Rhyo)

Matadalan