Múziku Lendáriu Zito Alves

Ami grava foufoun iha armajem ne’ebé agora Kmanek Supermerkadu agora uza daudaun ne’e. Muzika “Labarik Fuma”, ami halo gravasaun iha kuartu laran. Janela ho odomatan ami lori kulisaun mahar maka taka.

Múziku no kompozitór lendáriu Timor-Leste ne’e ninia moris ne’e arsik maka múzika. Múzika iha ninia moris mós halo parte tamba iha momentu ne’ebé nia senti triste,  frustradu, múzika maka halo lakon ninia stress sira ne’e hotu. Tanba músika laiha fronteira, la haree ba katuas no laharee ba foinsae, tanba too agora nia sei bele kanta no sei bele toka.  Ba nia, múzika laiha rohan ba ema ne’ebé sei moris no sei dada iis hela.

Ninia obra ka múzika ne’ebé nia hakerek oras ne’e ema sei kanta iha festa korematan ka festa kazamentu nian. Fiar ka la’e, ninia múzika hanesan “Oan Kiak”, “Tambasá”, “Hein De’it Ó”, “Ó ho Ha’u Ida De’it”, oras ne’e artista muzika foun sira sei gosta kanta iha festa. Nia mós gosta hakerek múzika revolusionariu desde nia sei iha ailaran (1977/1978). Iha ne’eba, nia hakerek múzika ba Radio Maubere hanesan múzika “Soldadu Javanes”, “Belu Lawai, Belu Labilay”, “Funu Laran”, “Ha’u Oan Kasian”, “Mai Mai Ó Nia Rain”, no múzika seluk tan. Muzika nia hakerek bazeia ba ema nia esperiensia no buat ne’ebé nia senti no akontese iha ninia moris.

“Ha’u ema múziku desde Português nia ukun. Ha’u toka iha banda no halo grupu banda ho kokegas barak. Ha’u toka banda Pérolas do Oriente, Vagabundo ne’e banda Chinês, timoroan ha’u mesak maka toka ho sira ho grupu Diamond Band. Ha’u aprende toka ho ha’u nia aman tanba ha’u nia aman mós tokador. Aprende mós hosi ha’u nia primos sira ho tio sira hotu… Sira uluk iha Band Blue Star no depois muda fali ba “Cinco do oriente”, la’os “5 do Oriente” ida agora ne’e,” dehan Zito António Alves ne’ebé moris iha Dili (10 de Dezembro de 1958) no oras ne’e servisu iha Administração Estatal liu-liu iha Descentralização Administrativa ne’e.

 Iha tinan 1981, nia hamutuk ho Tonny Perreita forma Band Loro Sa’e ho ninia membru Zito Alves nu’udar drummer, Tony Pereira Guitarra melody, Anacleto Ribeiro guitar bass, no José Turquel maka kaer órgan. Maibé, nia haktuir, 1980 nia toka uluk ho banda ida naran Fakun Melody hamutuk Chiquito Gama Solo/Melody, Vicente ren toos (drammer), órgan Anibal. Sira fahe malu iha tinan 1981 mak hamutuk forma fali Loro Sa’e band. Depois de Loro Sa’e Band rahun, sira forma fali Ramelau Band. Ramelau Band ne’e ninia personil Tony pereira, Zito Alves, Elias Freitas ho Dinus Khito.

Hosi esperiensia hirak ne’e, lori sira ba halo gravasaun ba múzika hirak be nia hakerek. Iha 1984, sira halo primeira gravação ho album “Labarik Fuma” hamutuk ho Tonny Pereira, José Turquel, Anito Matos ho Anacleto Ribeiro. Prosesu gravasaun primeiru liuliu halo ho Gravador baibain lori grupu AMIZI band ho muzika favoritu “Tasi Rai Henek Mutin”—hafoin halo tan album múzika “Labarik Fuma” no album seluk “Labarik Eskola Ba ho Labarik Namora no iha1986 nia ho Tonny Pereira halo tan album “Labarik Lanu” ne’ebé nia (Zito Alves) maka maka kanta rasik.

“Ami grava foufoun iha armajem ne’ebé agora Kmanek Supermerkadu agora uza daudaun ne’e. Muzika “Labarik Fuma”, ami halo gravasaun iha kuartu laran. Janela ho odomatan ami lori kulisaun mahar maka taka,” Zito Alves haktuir. (Cassimata)

Matadalan