SEFOPE LOKE ESTRADA BA FOHO TUTUN SOFRE BE MOOS

DILI - Xefe Suku Metiaut, Postu Admistravitu Cristu Rei, Munisípiu  Dili Júlio  da Costa Xavier, preokupa tebes ho Projeitu Empregu Rural (PER) hosi Sekretáriu Estadu Polítika Formasaun Profisional no Empregu (SEPFOPE) loke estrada ba foho tutun Metiaut ne’ebé susar tebes bee moos.

Estrada foun ne’ebé foin loke iha tinan 2015 ho distánsia 1.05Km hosi Metiaut Tasi ba foho ne’e, empreza Providensia Unipessoál Lda maka manan projetu no gasta osan estadu hamutuk millaun U$ 287, 026.35.

Xefe Suku Júlio haktuir, kondisaun estrada ne’e hahú át fali ona tanba impaktu hosi udan tau rai halai hodi taka estrada. No komunidade sira ne’ebé hela iha tasi ibun Metiaut mos seidauk ba hela iha foho tutun ne’e tanba bee moos laiha.

“Komunidade sira hela iha tetuk hasoru tiha ona problema bee moos, sa tan komunidade sira bainhira  muda sa’e ba hela iha foho leten,” Xefe  Suku Júlio  hatoo preokupasaun hirak ne’e ba Timor Post iha nia kna’ar fatin Metiaut, Segunda (04/04).

Xefe Suku dehan, sé  governu nia hanoin atu muda populasaun sira iha tasi ibun sa’e ba hela iha foho leten, entaun governu tenke hanoin halo didi’ak hafoin realiza, tanba kondisaun kuandu la di’ak labele obriga povu atu ba.

“Ita koalia kona-ba  estrada rural ne’e, ita atu dehan la di’ak liu mos ita hatun ita nia governu, mas hare ba kondisaun ne’ebé mak ita hare estrada ne’e la di’ak ona no susar tebes trasporte públiku  atu halo movimentu sa’e ba foho leten,” Xefe Suku Júlio hatutan.

Nia sentre triste tanba governu gastu osan ba loke estrada rural ne’e ho osan povu nian maibé la hatudu rejultadu di’ak.

Tuir observasaun Timor Post haktuir, komunidade sira iha tasi ibun Metiaut hala’o sira nia atividade hanesan baibain.

Portantu antes ne’e Diretór  Ezekutivu Luta Hamutuk Mericio Akara mos kestiona estrada rural ne’ebé mak SEPFOPE loke tenke iha uluk konkordansia hosi komunidade atu nune’e loke karik komunidade bele uza la’ós  animal mak atu uza fali.

“Labele loke dalan ba rai mamuk ida depois animal sira mak la’o fali iha estrada ne’e. Entaun, ekonomikamente modelu estrada hanesan ne’e laiha folin,” hatete Diretór  ejekutivu Luta Hamutuk, Mericio Akara ba Timor Post iha nia serbisu fatin Farol.

Hatan kona-ba kestaun ne’e, Sekretáriu  Estadu Polítika Formasaun Profisionál no Empregu (SEPOFPE), Ilídio  da Costa Ximenes, esplika antes ne’e katak, SEPFOPE loke estrada ne’e bazeia ba proposta hosi  xefe suku Metiaut katak, komunidade lubun ida mak planeia atu muda sa’e ba estrada ne’e, tanba área tasi ibun governu sei uza  ba dezenvolvimentu turístiku.

“Ita hahú loke estrada ne’e no ha’u fi’ar  neneik-neneik mós sei iha hotel ki’ik oan ruma no atividade negosiu seluk, tanba fatin ne’e nia paizajen furak tebes. Kuandu fatin ne’e furak ona, klaru katak ema barak mós sei komesa hanoin ona oinsá  halo sira nia negósiu,” hatete Ilídio  Ximenes ba Timor Post iha Metiaut, Dili, Sesta (09/01/2015).

Iha fatin hanesan, xefe Aldeia Metiaut, Mateus Inacio da Costa hatete, xefe familia sira ne’ebé sei muda sa’e ba estrada foun ne’e hamutuk 108, tanba governu sei utiliza hikas tasi ibun Metiaut ne’e ba dezenvolvimentu turístiku nian. Tanba ne’e, komunidade sira hein de’it bainhira governu hahú dezenvolve ona tasi ibun ne’e mak komunidade hirak ne’e mós sei evakua kedas ba estrada foun ne’ebé SEPFOPE loke tiha ona.

“Tanba ne’e mak kuandu tempu ne’ebá Maior Jeneral, Lere Anan Timur mai atu uza  fatin ida ne’e, ami koalia hodi hato’o proposta ida ba SEPFOPE hodi loke estrada ne’e hodi la’ós  fó asesu ba Jeneral Lere de’it, maibé inklui mós komunidade sira hotu,” hatete xefe Aldeia.(gus)

Timor Post