PEKADU ESTRAGA AMIZADE IHA FAMÍLIA NO SOSIEDADE

Bispu Diocese Díli, Dom Virgílio do Carmo da Silva, SDB haklaken iha nia homília ba misa selebrasaun festa Nossa Senhora Imaculada da Conceição, nu’udar Padroeira Paróquia Catedral nian esplika katak, sala ka pekadu hadook ema husi Maromak no estraga mós amizade iha família uma laran no iha sosiedade nia laran.

“Ohin ita agradese ba Maromak ba rahun di’ak no grasa oi-oin ne’ebé Na’i Maromak haraik ba nia oan nia inan. Nia de’’it mak moris mai la ho sala, maibé ita hotu la sees husi ida ne’e. No ita konsiente katak sala hirak ne’ebé ita halo, nune’e mós ho tendénsia isin, hanoin no hakarak nian sertamente hadook ita husi Maromak no estraga mós ita nia amizade ho ita nia maun alin, bin feton sira iha família no iha sosiedade nia laran, ida ne’e mak ita ema nia realidade”haklaken Dom Virgílio do Carmo, Kinta(8/12), iha Catedral Díli.

“Saida los mak novidade mai ita ohin, iha esperansa ruma mai ita ne’ebé  ohin komemora festa Imaculada da Conceição nian ne’e? iha ita ema nia vulnerabilidade, Maromak la abandona ita. Husi livru Geneses halo ita dala ida tan reflete oinsa Maromak besik mai ita. Adão ho Eva hatene katak, desobedese Maromak ne’e sala, maibé sira hakarak koko atu sai hanesan Maromak. Maibé iha momentu rona Maromak nia lian, sira tauk, moe tamba sira halo tiha ona sala no isin tanan. No hatan ba Maromak nia bolu, Adão duun ba Eva no Eva duun tutan ba samea, ikus mai kastigu Maromak ninian hahu husi samea, Eva hafoin mak Adão,”hatutan Dom Virgílio iha nia homília.

Amu Bispu Diocese Díli haktuir, samea mak satanas nia ulun no sai inimigu boot ba ema, maibé iha momentu dezesperasaun no inserteza boot ida ne’e nia laran, Maromak la’os de’it hakotu nia ligasaun maibé husik hela mós sinal esperansa nian ba humanidade.

“Samea o sei dolar de’it, han de’it rai-rahun, o nia jerasaun ho feto nian sei luli malu. Atu dehan de’it katak, diabu sei sai ema nia funu maluk permanente. Ida ne’e hatudu sinal ida katak, husi nia desendenti sei iha ida ne’ebé sei mai no konkista satanas ida ne’e. Husi Pe. da igreja balun refere ida ne’e ba Jesus, Mesias ho nia inan ne’ebé sei mai hanesan ita rona, feto sei sama, hanehan o nia ulun(Diabu),”hatutan amu Bispu.

Dom Virgílio hatutan, Virgem Maria liuhusi nia oan Jesus halakon tiha ona mate nia ukun, husi feto ida (Eva) sala tama iha mundu, no husi Maria humanidade tomak hetan hikas fali salvasaun.

“Maski ita ema vulnerável maibé Maromak lakohi ita atu lakon no mohu, tamba sa? São Paulo iha nia surat ba sarani sira iha Efesu dehan, rahun diak ba Maromak ita nain Jesus Kristu nia Aman husi lalehan tutun hodi Kristu Maromak haraik mai ita bensaun oi-oin, bensaun ne’e mak saida? ne’e mak molok hakiak mundu, Maromak fihir kedas ita, atu bele moris nu’udar ema Santu iha nia futar oin hanesan Maria”haklaken Dom Virgílio.

Dom Virgílio haktuir “Ita hotu hodi batizmu, ita simu vokasaun ida ne’e atu sai Santu, Maromak fihir ita atu moris nu’udar nia oan hakiak sira no liu-liu atu hahi Maromak hanesan nain Feto ne’ebé nia fihir molok mundu hahu, atu nia nafatin Santa no sala laek.

Nune’e amu Bispu Diocese Díli, fó hanoin ba sarani sira tenki sente orgullu ba grasa espesial ne’ebé Maromak haraik ona ba ema hotu atu sai nia oan hakiak, no ho festa Imaculada da Conceição ida ne’e hakarak atu dehan ba sarani sira hotu atu admira, dejeisa no koko atu moris iha virtude laran mos ninian no hakribi isin nia hakarak sira no habitu a’at sira iha moris nu’udar ema sarani.

Partisipantes ne’ebé hola parte iha festa selebrasaun Nossa Senhora Imaculda da Conceição mak hanesan, Vigário Geral Diocese Díli, Pe. José António, Vigário Episcopal Asuntu Pastoral, Pe. Juvito Rêgo Araújo, Vigário Episcopal Vida Consagrada, Vigário Epicopal Asuntu Edukasaun, Pe. Guilhermino da Silva, Vigário Episcopal Asuntu Sosial, Pe. Imanuel, amu Pároco sira, Vigário Paroquias, Superiores sira, padre no madre, Seminarista, Konsellu Pastoral, Grupu kategorial no sarani sira.ías

Jornal Nacional