Desizaun Diak Laprejudika Vida Povu

DILI – Organizaun Rezistensia RENETIL sujere Xefe Estadu Francisco Lu Olo foti desizaun neebe diak no los, relasiona ho polemika politika iha rai laran atu lalika prejudika vida povu.

Tuir portavoz RENETIL Jose Luis Oliveira, nuudar reprezenta organizasaun RENETIL mai halo enkontru ho Prezidente Republika hodi aborda no troka impresaun kona ba oinsa fo hanoin ba Prezidente Republika hodi foti desizaun ba kestaun sira neebe maka dadaun nee lao hodi Xefe estadu bele foti dezisaun neebe diak no los hodi labele fo impaktu no hamosu buat neebe maka povu hotu lahakarak.

“Ami fo ami nia sujestaun ba Prezidente Republika relasiona ho situasaun neebe maka lao dadaun nee hodi foti desizaun ka medidas ruma nee diak no los hodi bele antisipa ba situsaun neebe ita hotu lakohi relasiona ho situsaun neebe dadaun nee lao,” dehan  Jose Luis Oliveira ba Jornalista sira hafoin remata enkontru ho Prezidente Republika Francisco Guterres Lu Olo iha Palasiu Prezidensial Bairru Pite, Segunda (6/11/2017).

Nia dehan povu nee presiza  hakmatek no moris diak iha paz no estabilidade tamba nee maka organizasaun RENETIL fo hanoin ba Prezidente Republika atu politikamente hare ba konstitusaun hodi foti desizaun los no diak  tamba dadaun nee iha situasaun neebe maka inserteza nia laran.

“Ita hare dinamiku neebe maka akontese iha parlamentu no partidu sira balun halo deklarasaun no ida nee halo ita hotu preokupadu, tamba nee ami deskute ho Prezidente Republika, no ida nee tuir konstitusaun RDTL Xefe Estadu nuudar  orgaun neebe maka asegura  funsionamentu normal ba orgaun soberania sira no garantia unidade nasional, ita lakohi para iha orgaun  governu nian buat balun la funsiona ho diak  ita hakarak buat hotu lao diak, tamba nee maka ami troka  hanoin ruma ba malu Xefe Estadu,” dehan  Jose Luis Oliveira.

Relasiona ho espektativa balun neebe maka sei mosu eleisaun antisiapa no referendum tuir Jose Luis Oliveira katak ida nee fila fali ba konstituisaun RDTL nian. Eleisaun antisipa nee Prezidente tenke foti desizaun liu husi meius oin oin antes too ba iha kestaun nee.

“Ita labele hare Prezidente Republika nudar simbolu estadu deit maibe Xefe Estadu mos garantia funsionamentu orgaun soberania tamba nia maka fo tomada de posse membru governu sira nunee husi ami apoiu Prezidente Republiku atu ezerse knaar konstitusional hodi garantia ba governu neebe maka estavel liu husi dialogu sira neebe Prezidente Republika halo relasiona ho situasaun sira neebe dadaun nee lao,” tenik Jose Luis Oliveira.

Husi RENETIL nia propoin ba Prezidente Republika ligadu ho kestaun sira nee tuir Jose Luis Oliveira katak Prezidente Republika tenke konvoka dialogu lider partidu politiku sira nunee mos hamutuk ho lideransa historiku sira tamba sira maka iha esperensia kona ba buat sira nee hodi bele buka solusaun hodi bele fo buat diak ba nasaun nee.

Antes nee  grupu Sidadaun  Hadomi Paz  liu husi nian portavoz  Luis  Sampaio hateten enkontru ho Prezidente Republika hodi bele  hare  fo solusaun  ba kestaun sira neebe dadaun lao hela. Nia mos husu ba xefe estadu atu bele hare resolve kestaun no buka solusaun ba hodi resolvetuir nia kompetensia konstituisional atu solusiona governasaun nee para bele estavel labele mosu kestaun oin oin.

Nunee mos organizaun Komite 12 Novembru antes nee liu husi Prezidente Komite 12 Novembru Grigorio Saldanha husu historiku sira labele fila kotuk ba balu maibe hamutuk oinsa halo dialogu bele solusiona tiha polemika politika neebe dadaun nee lao para bele garantia estabalidade governativa. 

Natalino Costa | Suara Timor Lorosae