DILI, (TATOLI) - Empreza
telekomunikasaun Telkomcel iha planu atu investe rede Fibra Óptika (fibre
optic) iha Timor-Leste tanba Fibra Óptika hanesan rede internet ne’ebé lais liu
iha mundu dijitál.
CEO Telkomcel, Yogi Riskian Bahar
hato’o asuntu ne’e ba jornalista sira iha Palásiu Prezidente Nicolau Lobato,
Bairru Pité, Dili, segunda ne’e, hafoin informa planu investe rede Fibra Óptika
ba Prezidente Repúblika, Francisco Guterres Lú Olo.
Yogi esplika katak rede ne’e sei
liga liuhusi área tasi Atambua, Indonézia no sei to’o iha Dili ho durasaun
fulan 6.
Iha biban ne’e, CEO Telkomcel mós
konvida Xefe Estadu atu partisipa iha lansamentu ba 4G Telkomcel iha Timor
Plaza ne’ebé sei realiza iha 24 Fevereiru no ida ne’e sei sai ónra boot ba
sira, bainhira Prezidente Repúblika bele partisipa iha eventu ne’e.
Nia hatutan, maske ho situasaun
polítika iha Timor-Leste la’o ladun di’ak, maibé kompañia Telkomcel iha
kompromisu nafatin hodi halo investimentu no hala’o operasaun iha Timor-Leste.
Oras ne’e daudaun, nia haktuir,
timoroan sira ne’ebé serbisu iha Kompañia Telkomcel ho porsentu 85 no ema na’in
8 mak iha ona posizaun estratéjiku sira. CEO Telkomcel ne’e espera katak iha
tinan sanolu mai tan, timoroan bele sai ona CEO (líder ezekutivu) ne’ebé ás liu-ba
kompañia Telkomcel iha Timor-Leste.
Enkuantu, Prezidente Repúblika
hato’o nia apresiasaun boot ba Kompañia Telkomcel ninian serbisu no kompromisu
sira ne’ebé mak hato’o.
Jornalista: Xisto Freitas | Editór:
Manuel Pinto
Imajen: CEO KompañaTelkomcel,
Yogi Riskian Bahar (hamriik klaran—liman karuk hosi Prezidente) ho nia ekipa,
hasai foto hamutuk ho Prezidente Repúblika, Francisco Guterres Lú Olo, hafoin
enkontru. Imajen Mídia Palásiu PR.
Sem comentários:
Enviar um comentário