DILI, (TATOLI) - Autoridade
Inspesaun no Fiskalizasaun ba Atividade Ekonómika no Sanitária (AIFAESA) husu
apoiu ba Ministériu Públiku ((MP) no Polísia Nasionál Servisu Investigasaun
Kriminál (PNSIK) nian. Atubele halo kontrolu di’ak ba atividade ekonómika
ne’ebé ohin loron la’o barak loos iha Timor-Leste.
Adjunta Prokuradór Jerál
Repúblika (PJR), Zelia Trindade, hatete AIFAESA hanesan institutu ida ne’ebé
iha kompeténsia ba iha kontrola no inspesaun ba atividade ekonómika liuliu ba
empreza sira ne’e importante tebes atu koopera hamutuk tanba dala barak serbisu
iha terrenu hasoru problema.
“Ha’u haree importante tebes
oinsá atu ko’alia mekanizmu koordenasaun no kooperasaun ho Ministériu Públiku
bainhira iha terrenu mak sira hetan problema ruma liga ho krime sira bele
haruka kedan bá Ministériu Públiku no hamutuk ho Polísia atu akompaña kedan,
depois haree problema sira liuliu iha indísiu krime sira bele halo kedan
partisipasaun mai Ministériu Públiku hodi haree halo prosedimentu kriminál bá
oin,” Zelia dehan hafoin enkontru entre Prokuradór Jerál, PNSIK no AIFAESA, iha
PJR Kolmera, ohin.
MP mós tau importánsia ba asuntu
ida ne’e tanba ministériu ne’e iha mós autoridade kontrola en-jerál liuliu
atividade sira hotu ne’ebé iha rai-laran, MP iha kompeténsia atu haree oinsá
mak sira labele viola lei sira ne’ebé vigora ona no iha mós gabinete sentrál
kombate korrupsaun no krime organizadu no sesaun ida ba serbisu kontesiozu
Estadu nian.
“Ida ne’e dehan katak ema sira
ne’ebé halo atividade ne’ebé latuir lei ou halo infrasaun ruma bele bá iha atu
kriminál no bele mós iha sivíl. Entaun Ministériu Públiku nia kompeténsia ida
mós oinsá bele fó defeza ba direitu difuzaun koletivu nian no bá oin oinsá mak
bele servisu hamutuk ho AIFAESA atubele halo kontrolu ida ne’ebé mak di’ak ba
atividade akonómika sira ne’ebé ohin loron barak tebes iha ita-nia rai-laran”.
Liuhusi enkontru ida ne’e hanesan
faze dahuluk PJR, PNSIK no AIFAESA para haree bá futuru oinsá atu servisu
hamutuk sai metin liután ba kontrolu atividade ekonómika sira ne’ebé la espera
bele mosu.
Koordenadór AIFAESA, Abílio
Oliveira Sereno, hatete apoia ne’ebé husu mak ba atividade ne’ebé AIFAESA hetan
kuandu halo nia operasaun sempre iha asaun administrativa no kriminál no ho
enkontru ida ne’e halo AIFAESA hetan motivasaun di’ak ho apoiu maka’as
husi MP para hahú ohin bá oin reforsa liután apoiu ba operasaun ne’ebé
AIFAESA halo liuliu ba matéria kriminál.
Tanba ohin loron iha
interpretasaun oioin kona-ba lejislasaun no ema barak mak halo serbisu latuir
nia kompeténsia maka AIFAESA husu ba MP para labele kria tan konfuzaun ba
operadór ekonómiku sira no ba populasaun no kosumidór sira.
“Ida ne’e mak reforsa ami-nia
interese atu mai husu tulun no apoiu Ministériu Públiku para interpretasaun
ne’ebé ami halo bele loos no bele hetan klarifikasaun husi sira bainhira ami
implementa lei sira ne’ebé regula atividade ekonómika”.
AIFAESA tama iha faze ida ne’ebé
krusiál tebes kuandu implementa diploma ida ne’ebé dezde 2008, 2009 no 2011 no
agora mak foin implementa no diploma sira ne’e regula atividade ida ne’ebé to’o
pontu ida bele taka atividade hanesan restaurante sira ne’e. “Ida ne’e presiza
apoiu Ministériu Públiku nian para haree didi’ak interpretasaun ne’ebé loos ka
laloos”.
Apoiu ne’ebé sei fó husi MP ba
AIFAESA mak bainhira infratór sira lakohi selu koima maka AIFAESA bele rekorre
para bele halo ezekusaun pagamentu tuir rega ne’ebé MP hatene.
“Apoia ida mak kuandu halo
operasaun karik envolve polisia kriminál kuandu iha situasaun krime karik hodi
intervene direta”.
Aleinde ne’e ajuda seluk mak
haree hamutuk ho ministériu hotu-hotu para labele hadau malu iha serbisu nian.
“Ida-idak hala’o nia serbisu tuir orgánika ne’ebé iha, ida ne’e Ministériu
Públiku mak sei haree, estuda didi’ak para ultrapasa situasaun sira hanesan
ne’e”.
Relasiona ho serbisu inspesaun
nian ne’ebé ministériu balun halo, AIFAESA haree katak Ministériu Komérsiu no
Indústria intevene sebisu ne’ebé AIFAESA halo.
“Tuir ami-nia haree, dalaruma
ami-nia interpretasaun mak sala karik, tan hanesan ne’e mak ami husu Ministériu
Públiku haree, maibé Ministériu Públiku mós hatete ona tanba AIFAESA iha
nia tutela ba Primeiru-Ministru maka situasaun ne’e bele rezolve iha Konsellu
Ministru de’it”.
Jornalista: Maria Auxilidora | Editór:
Manuel Pinto
Sem comentários:
Enviar um comentário