DILI, (TATOLI) – Xefe Estadu
Maior FALINTIL-Forsa Defeza Timor-Leste (F-FDTL), Majór Jenerál Lere Anan
Timur, hateten membru F-FDTL sira ne’ebé durante ne’e halo seguransa ba kampaña
no eleisaun antesipada iha terrenu (munisípiu 13) sei retira iha aban, 31 maiu
2018, eseptu Uatulari (Vikeke) tanba situasaun iha ne’ebá seidauk seguru
didi’ak.
“Situasaun iha Uatulari ne’e
seidauk estável. Loron ruma ha’u sei to’o iha ne’ebá atu ko’alia ho sira
kona-ba estabilidade no pás”, Lere ba jornalista sira iha Palásiu Prezidente
Nicolau Lobato, Bairru Pité, kuarta ne’e, hafoin relata situasaun seguransa ba
Xefe Estadu, Francisco Guterres Lú Olo.
Lere Anan Timur haktuir oknum
balun kontinua ameasa malu iha área ne’ebá (Uatulari) hafoin eleisaun
antesipada, maibé ameasa hirak ne’e ho grau ne’ebé ki’ik, lahanesan iha tempu
sira ne’ebé liu ona, tanba tinan-tinan sira (Uatulari oan) sempre manán
konsiénsia no manán responsabilidade.
“Ita nia maluk barak mate ba funu
ida ne’e, ne’e duni ita ne’e maka tenke fó ita nia kontribuisaun ba Nasaun”,
katak.
Ulun boot forsa ne’e hatutan tan:
“Ohin loron ita bele dehan sira ne’ebé uluk moris di’ak ne’e moris di’ak ba
nafatin. Uluk situasaun aat sira di’ak, agora ita atu moris di’ak, sira moris
di’ak nafatin”.
Tanba ne’e Majór Jenerál
husu atu hadau moris. Katak, oinsá oan sira bele eskola no moris iha hakmatek
nia laran duké sunu malu.
Jornalista: Xisto Freitas | Editora:
Rita Almeida
Imajen: Xefe Estadu Maior
FALINTIL-Forsa Defeza Timor-Leste (F-FDTL), Majór Jenerál Lere Anan Timur.
Sem comentários:
Enviar um comentário