DILI, (TATOLI) – Diretór
Institutu Defeza Nasionál, Pedro Klamar Fuik, hatete asuntu tasi sei iha
problema barak, tantu iha tasi leten, laran no okos, tanba ne’e presiza kria
autoridade marítima ida kompetente hodi kontrola.
“Rikusoin sira ne’e presiza iha
seguransa, se seguransa laiha oinsá mak ita atu asegura. Fronteira marítima iha
ona maibé saida de’it mak ita atu halo hodi proteje tasi”, hatete nia iha
konferénsia internasionál kona-ba tasi ne’ebé hala’o iha salaun ministériu
finansa, Aitarak-laran, ohin.
Nia haktuir iha tasi leten, ró
hirak ne’ebé movél tenke hatene katak sira nia atividade saida, se sira fakar
oleu ka lixu ruma bele estraga meiu ambiente iha tasi, nune’e mós atividade
peska illegál sira.
Tanba ne’e, Timor-Leste tenke
kria sistema autoridade marítima ida di’ak, kompetente, kredivél atu afirma
autoridade Estadu nian iha tasi, se laiha autoridade atu kontrola iha tasi,
oinsá mak bele produz ikan ne’ebé sustentavél ba jerasaun foun sira.
Estadu nia rikusoin iha tasi
laran, nia dehan enkuantu seidauk kria autoridade marítima hodi bele iha kbiit
atu kontrola, agora ita sei iha tasi ibun de’it, ita seidauk to’o ba tasi
klaran, aat liu oinsa mak ita bele ba tasi kidun.
Parte seluk, Prezidente
Repúblika, Francisco Guterres Lú Olo, afirma konferénsia ne’e importante tebes
hodi ko’alia kona-ba asuntu tasi, tanba rikusoin barak iha tasi laran, la’os
ko’alia de’it rai maran.
Asuntu tasi importante atu
governante sira haree hodi promove, atu bele halo aproveitamentu, liliu ba
jerasaun foun sira.
Enkuantu, konferénsia
internasionál ne’e ho objetivu promove reflesaun liuhosi debate kona-ba asuntu
tasi iha kontestu nasionál no emerje sekúlu XII, nune’e bele formula hodi sai
estratéjia nasionál tasi nian.
Nune’e mós identifika no promove
atividade estratéjiku iha nivél setoriál ho intensaun atu dezenvolve no
estabelese kuadru hanesan estatéjia nasionál tasi nian.
Entretantu, konferénsia ne’e
organiza hosi Institutu Defeza Nasionál, realiza durante loron rua, hahú ohin
no termina aban.
Jornalista: Zezito Silva | Editora:
Rita Almeida
Prezidente Repúblika, Francisco
Guterres Lú Olo, inklui bainaka seluk partisipa konferénsia internasionál
kona-ba tasi ne'ebé organiza hosi Institutu Defeza Nasionál, iha salaun
Ministériu Finansa Aitarak-laran. Foto Egas Cristovão
Sem comentários:
Enviar um comentário