Negósiu Ró Kruzeiru Iha Timor-Leste Hahú Dezenvolve

DILI, (TATOLI) – Xefe Turizmu ba Ema Hotu husi Ajénsia Estadu Unidu ba Dezenvolvimentu Internasionál (USAID, sigla iha inglés), Peter Simone, hatete negósiu ró kruzeiru dezenvolve liu iha mundu no iha Timor-Leste hahú ona iha progresu.

“Negósiu ró kruzeiru hahú dezenvole, iha 2016 iha de’it ró ida, 2017 iha haat, 2018 iha haat no tinan oin maizumenus sei iha ró neen. Bainhira ita haree ba oin karik 2025 sei iha ró 20, 30 ka 50 hanesan ne’e no klaru sei iha ró barak”, Simone afirma iha ámbitu diskusaun padraun ba prosedimentu operasionál (SOP, iha inglés) turizmu kruzeiru nian ho Governu no parte interesada sira iha Sentru Konvensaun Dili, ohin.

Tuir dadus ne’ebé fó sai katak turizmu kruzeiru iha Timor-Leste husi 2016 iha ró ida ho naran P&O ne’ebé tula pasajeiru hamutuk 2,020 no gasta osan hamutuk $90,000, iha 2017, ró haat ho naran hanesan ne’ebé lori turista 3,942 no gasta osan $200,760.

Iha tinan kotuk Peace Boat haat tula ema 3,299 no hasai osan $197,940, iha tinan oin sei iha ró neen ne’ebé sei tula pasajeiru 3,500 no sei gasta $210.000 bainhira sira mai vizita país ne’e.

“Signifika ida ne’e poténsia tebes ba Timor-Leste no bainhira ita haree negósiu ró kruzeiru ne’e ba de’it atividade turizmu nian”.

Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, hatán relasiona ho númeru kruzeiru ne’ebé aumenta no oinsá atu dezenvolve fatin turístiku sira katak atu dezenvolve produtu ne’e labele hatudu liman de’it ba Governu, maibé ema hotu nia responsabilidade.

“Komunidade baibain nia kontribuisaun importante hanesan problema lixu sira ne’e, tenke mantein seguransa, ospitalidade, turista mai ita fasilita informasaun ba sira, maibé se ita dehan hotu-hotu Governu sei susar atu la’o bá oin. Ne’ebé kruzeiru atu la’o bá oin elementu hotu-hotu serbisu hamutuk. Konserteza Governu maka iha responsabilidade, liuliu kona-ba polítika, regulamentu, maibé haree ba operasionál tenke kontribui hotu, liuliu setór privadu, komunidade, taxista sira”.

Jornalista: Maria Auxiliadora | Editora: Rita Almeida

Imajen: Xefe Turizmu ba Ema Hotu husi Ajénsia Estadu Unidu ba Dezenvolvimentu Internasionál (USAID, sigla iha inglés), Peter Simone, aprezenta SOP ba parte interesada sira. Foto/MTKI.