Korupsaun Bele Ameasa Dame

DILI, (TATOLI) – Prezidente Repúblika, Francisco Guterres Lú Olo, hatete korupsaun bele ameasa dame tanba, hamosu dezigualdade no injustisa sosiál. Katak, ema la hetan oportunidade no direitu hanesan, liuliu sira ne’ebé la koñese ka laiha família kaer servisu importantes Estadu nian.

“Favór selu favór hamosu nepotizmu no sira ne’ébé hetan benefísiu tuur nonook de’it. Mosu elite riku, katak ema uitoan de’it ne’ebé riku ba beibeik enkuantu maioria kiak ba beibeik”, dehan Xefe Estadu liuhusi lansamentu Manual Treinamentu ba Servidór Públiku no Website Sentru Estadu ba Dame no Dezenvolvimentu (CEPAD-sigla portugés) iha otél Timor, sesta ne’e.

Nia haktuir tanba korrupsaun buras mós iha servisu públiku, nune’e servidór públiku balun, biar simu vensimentu ki’ik, hatudu sinál boot halo korrupsaun.

“Sinál balun maka kaer kareta luxu no harii uma boot, sai ba rai-liur beibeik nu’udar turista”, afirma.

Nia akresenta: “Ha’u hanoin la’ós susar atu kaer-hetan servidór públiku sira ne’ébé uza rikusoin Estadu nian hodi hariku-án babeibeik. Naran katak iha vontade polítika hosi lider sira, ukun-na’in no responsável prinsipál sira atu harii sistema ne’ebé bele buka tuir no kaer-hetan sira ne’ebé uza rikusoin Estadu nian hodi hariku-án”.

Nia hatutan presiza hatuur sistema liuhosi dalan legál, atu servidór públiku no sidadaun bele hatene kedas saída maka akontese ba sira, bainhira kaer-hetan halo korrupsaun.

Tuir estudu hosi Banku Mundiál 2015-2016, Xefe Estadu tenik korrupsaun aas iha Timor-Leste, nune’e hasa’e kustu investimentu no tuir estudu ne’e molok hetan kontratu, tenke lolo uluk envelope porsentu 15.

“Sé ita la halo buat ida ka taka matan no la denúnsia, tanba korruptór ne’e família ida ka belun ida ka ita rasik hakarak hetan mós benefísiu ruma, moras boot ida ne’e sei da’et ba beibeik no harahun ita-nia dignidade nu’udar ema no nu’udar nasaun”, realsa.

Iha biban ne’e, Prezidente Repúblika hateten lansamentu ba Manual Treinamentu ne’e di‘ak teb-tebes, tanba sai matadalan ba servidór públiku atu oinsá serbí sidadaun ho di’ak bainhira husu informasaun kona-ba servisu Estadu nian.

“Sidadaun aprende hosi manuál sira ne’e katak Estadu iha devér atu harii sistema efisiente ba servisu públiku no hatuur servidór públiku ne’ebé hatene oinsá serbí públiku ho laran kamaan no efisiénsia”, dehan.

Nia fó parabéns ba CEPAD, Grupu Traballu Nasionál no ajénsia internasionál sira ne’ebé fó liman ba timoroan atu lori ba oin projetu ida ne’ebé hahú iha Timor-Leste, iha 2007 no hala’o ona inisiativa barak ho susesu.

CEPAD harii hosi timoroan sira, hosi grupu ki’ik ida ne’ebé fó-án tomak atu ajuda Estadu harii fila fali, habelar liu-tan no hametin ba beibeik kondisaun ida ne’ebé importante teb-tebes ba dezenvolvimentu no moris-di’ak.

Jornalista: Xisto Freitas | Editora: Rita Almeida

Imajen: Prezidente Repúblika, Francisco Guterres Lú Olo. Imajen António Gonçalves