quarta-feira, 17 de outubro de 2018

Teste Laboratóriu Ba Ai-fuan Saburaka Lakontein Ho Raan


DILI, (TATOLI) – Rezultadu husi teste laboratóriu kona-ba produtu saburaka ne’ebé konsumidór sira deskonfia katak kontein ho raan ne’ebé kontaminadu ho virus HIV/SIDA, bainhira reklama ba Autoridade Inspesaun no Fiskalizasaun Atividade Ekonómika no Sanitária (AIFAESA) hatudu la deskobre raan, signifika ai-fuan ne’e lakontein ho raan.

Diretór Departamentu no Planeamentu Operasionál, Risku Alimentár no Laboratóriu AIFAESA, Ângelo Belo, hatete liuhusi teste ne’ebé halo iha Laboratóriu Nasionál Saúde ne’e ladeteta raan iha laran.

“Virus HIV/SIDA ne’e lamoris iha kualkér fatin, tenke moris iha ambiente ne’ebé favorese no ambiente ne’ebé merese liu maka tenke moris iha raan nia laran duni”, Ângelo afirma iha Matadouru, ohin.

Antes ne’e konsumidór sira preokupa ho saburaka ne’ebé sosa iha loja, tanba bainhira atu han, maibé iha produtu ne’e nia laran hetan fali kór mean, tan ne’e observasaun ne’ebé AIFAESA halo katak saburaka ne’e nia natureza maka mean duni.

“Iha buat seluk ne’ebé ita deskonfia, ita seidauk bele halo tanba haree ba fasilidade ne’ebé iha seidauk bele halo análiza kle’an liután. To’o agora ami-nia kontaktu ho laboratóriu referénsia sira seidauk bele halo buat seluk no buat ne’ebé sira bele halo maka deteta kona-ba raan duni ka la’e?”

Ho análiza ne’ebé fó sai ona husi AIFAESA ne’e signifika laiha virus ida, tanba ne’e saburaka ne’e bele konsome.

“Maibé iha informasaun balun hatete iha aditivu balun ne’ebé tau iha laran ita lahatene tanba to’o agora ita seidauk halo tanba kondisaun seidauk permite atu halo ida ne’e”.

Iha 6 setembru 2018, konsumidór hato’o keiza ba AIFAESA sobre produtu ne’ebé deskonfia ema balun hatama raan no hanesan entidade ne’ebé responsavel ba ai-han buka tuir dúvida ne’ebé iha no iha 7 setembru autoridade ne’e foti amostra saburaka tolu iha supermerkadu Lita no Dili Mart hodi halo teste iha laboratóriu.

Jornalista: Maria Auxiliadora

Editora: Rita Almeida

Lee mós:  

Sem comentários: