Ekipa Konjuntu Kaptura PSHT Timoroan Nain 37 Fila Hosi Indonézia

Timor Post (09/09/2020 -- Komandante Relasaun Públika Komandu Jerál PNTL, Superintendente Xefe Polísia Arnaldo Araújo kuarta (09/09) informa ekipa Konjuntu entre F-FDTL, UPF no KOE kaptura membru Grupu Arte Marsiais PSHT nian 37 iha dalan Ilegál fronteira Mota-Ain Timor-Leste-Indonézia.

Portavós Komandu Jerál PNTL ne’e dehan Timoroan hirak ne’e atu ba tuir ezame hasa’e sintu iha Atambua maibé ekipa konjuntu entrega sira ba ekipa vijilánsia saúde hodi kumpre regras Kuarentena durante loron 14 iha Fronteira Mota Ain.

“Ha’u atu informa iha dia 4 to’o dia 7 de Setembru, ekipa Konjuntu ne’ebé kompostu hosi UPF, F-FDTL no KOE Kaptura Sidadaun sira ne’ebé maka pasa Fronteira hodi ba halo ezame sabuk iha Indonézia na’in 37. Oras ne’e sira nain 37 tama hela Kuarentena iha Fronteira Mota Ain Batugade”, informa Komandante Arnaldo iha kuartél jerál PNTL Kaikoli.

Enkuantu atributu sira ne’ebé ekipa Konjuntu sita hosi timoroan hirak ne’e oras ne’e entrega ona baa Komandu PNTL Munisípiu Bobonaru sai nu’udar evidénsia hodi prosesu ba Ministériu Públiku.

“Sira ne’e hosi grupu Arte Marsiais ne’ebé imi hotu hatene ona, sira ba izame hasa’e sabuk iha Indonézia, sira fila mai maka ekipa Konjuntu Kaptura, ha’u dehan tiha ona sira hosi PSHT”, adianta Komandante Relasaun Públika PNTL ne’e.

Komandante ne’e realsa hafoin sidadaun na’in 37 hosi organizasaun PSHT kumpre Kuarentena loron 14, sei kontinua lori ba Komandu PNTL Munisípiu Bobonaru hodi submete ba prosesu investigasaun ba Ministériu Públiku nian.

Jornalista: Jaime Pires