CPLP. Organizasaun tenki loke tan fatin ba negósiu

Komunidade Nasaun sira Lian Portugés nian (CPLP) tenki loke tan fatin ba negósiu no ba emprendedorizmu, kapitaliza nune'e iha oportunidade sira ne'ebé iha rejiaun sira ne'ebé nia Estadu-membru sira halo parte, hatete hosi primeiru-ministru timoroan ba Lusa.

"Tenki loke tan fatin no fó tan oportunidade sira ba área emprezarial iha ámbitu CPLP nian tanba iha potensialidade maka'as, la'ós de'it iha CPLP nia laran maibé liuliu iha área sira ne'ebé membru ida-idak CPLP nian halo parte", afirma ona hosi Rui Maria de Araújo.

"Iha Áfrika, iha Ázia no Pasífiku no iha Amérika Latinu, iha potensialidade sira maka'as no ita tenki loke tan fatin ba emprendedór luzófonu sira hodi sira aproveita oportunidade ne'e", nia hatutan.

Konversa ho xefe Governu akontese relasionadu ba tinan 20 hosi organizasaun nian ne'ebé selebra iha loron 17 Jullu, no hanesan balansu hosi mandatu ba prezidénsia rotativu ne'ebé kaer hosi Timor-Leste hahú hosi fulan-Jullu 2014 - ne'ebé sei transfere ba Brazil iha simeira tuirmai hosi xefe sira Estadu no Governu nian, ne'ebé previstu ba fulan-Novembru, maibé seidauk iha loron markadu.

Nia fó hanoin ona, prezidénsia ida ne'ebé Timor-Leste insisti ona iha ajenda ekonómiku, elementu ida ne'ebé hakarak haree iha sentralidade hosi vizaun estratéjiku foun ida hosi organizasaun no ne'ebé hanesan planu hosi novidade balun hosi mandatu timoroan nian.

"CPLP hanesan fatin ida importante tebes ba Timor-Leste. No Timor-Leste tenta hala'o dinámika foun ida, liuliu iha komponente ekonómiku. Rezultadu sira hosi prezidénsia hatudu daudaun katak organizasaun kontinua relevante. La'ós de'it iha área lian no polítiku-diplomátiku nian maibé iha perspetivu ida hodi hametin koperasaun ekonómiku nian", nia hatutan.

Halo balansu ida "pozitivu tebes" hosi prezidénsia timoroan, Rui Araújo fó hanoin susar balun, inklui distánsia, iha "mobilizasaun hosi setór tékniku balun ba enkontru sira iha nível ministerial nian".

Maski nune'e, Timor-Leste konsege organiza ona ho susesu 70% hosi reuniaun sira, haree Guiné Ekuatorial partisipa iha sesaun oioin no konsege ona "dinamiza prosesu hodi hamosu dinámika foun ida iha área ekonómiku" no emprezarial, nia hatete.

"Estabelese ona fórum ekonómiku global dahuluk CPLP nian no hanoin ona atu fórum ne'e kontinua tinan-tinan. Timor-Leste prepara daudaun hodi sai hanesan anfitriaun regular ba eventu ne'e", nia hatete.

Prezidénsia permiti mós hodi hetan akordu katak "Timor-Leste situa iha área estratéjiku ida, halo ligasaun ho nasaun sira seluk hosi ASEAN no nasaun sira seluk hosi Pasífiku ne'ebé área emprezarial CPLP nian bele iha knaar ida", liuliu iha nível emprendimentu komersial sira no investimentu nian, hatutan hosi primeiru-ministru.

Angola, Brazil, Cabo Verde, Guiné-Bissau, Guiné Ekuatorial, Mosambike, Portugal, São Tomé & Prínsipe no Timor-Leste maka halo parte iha CPLP.

SAPO ho Lusa