GOVERNU PRESIZA MILOENS US$111.7 SELU PROJETU

DILI - Vise Ministru Finansas (MF), Helder Lopes husu ba membru parlamentu nasionál atu halo aprovasaun ba orsamentu ratifikativu ho montante milões $111.7 atu nune’e bele uza hodi selu projetu sira ne’ebé maka la’o ona to’o fulan dezembru 2016.

“Justifikasaun primeiru ritmu implementasaun projetu infra-estrutura sira ne’e la’o maka’as liu tanba iha melloramentu maka’as hosi parte governu no ema ne’ebé implementa projetu, nune’e osan ne’ebé iha la selu to’o fulan dezembru, tanba ne’e maka ita presiza tan osan atu selu to’o dezembru maka ho montante $111.7 milões,” hatete Helder Lopes iha Parlamentu Nasionál, Kuarta, (13/07).

Tanba ne’e to’o fulan dezembru tenke presiza osan milões $111.7 tau hamutuk ho osan original hodi selu projetu sira agora lao, ne’ebé maka iha antes ne’e setór privadu sira implementa ona projetu, ne’e 28% hosi total orsamentu ratifikativu.

Orsamentu ne’ebé atu selu dívida ba projetu emerjensia sira iha milaun $1.4, ou 13.1%, ba projetu eletrisidade la’o ona, halo ona verifikasaun no presiza selu ho valor ne’ebé tau ba orsamentu ratifikativu iha milaun $29.7 ou 7.6%.

Ne’ebé orsamentu ratifkikativu atu selu projetu bo’ot tolu, milões $111.7 milões ba projetu sira atu la’o maibé presiza tan osan atu selu, ne’ebé dívida tau hamutuk menus hosi 20% hosi orsamentu ratifikativu. 

Orsamentu ratifikativu ne’ebé governu propoin ba Parlamentu Nasionál (PN) atu aprova tanba nia justifikasaun fundamental tolu, primeiru ritu ezekusaun ba fundu enfra-estrutura lao maka’as liu tanba iha melloramentu maka’as liu tantu iha governu no ema sira ne’ebé implementa projetu.

Tanba ne’e maka orsamentu ne’ebé aprova ba tinan 2016 hodi finansia ba projetu sira ne’e la sufisiente atu selu to’o fulan dezembru tinan ne’e, tanba ne’e maka governu halo ona estimasaun katak, to’o fulan dezembru presisa osan tan hodi selu projetu sira ne’e.

Justifikasaun segundu maka iha projetu estratejiku bo’ot tolu ne’ebé governu asina ona kontratu, presiza finansia, projetu bo’ot tolu ne’e maka hanesan Portu Tibar, Drainagen Dili no Suai Supplay base.

Ho ida ne’e maka governu presiza tau osan, tanba tinan oin, hanoin katak atu limita orsamentu ba $1.2 biloes ho nune’e iha espasu atu finansia projetu sira ne’e iha tinan oin, tanba ne’e maka governu tau iha proposta orsamentu ratifikativu hodi komprimisiu sira ne’e tau hotu iha orsamentu ratifikativu.

Ezemplu de’it portu Tibar, tuir kontratu loron fulan 11 tenke tau ona garantia iha escrot count ho montante $130 miloes, tanba ne’e maka orsamentu ratifikativu, governu husu atu PN aprova hodi tau iha escrot count hodi governu nia kontribuisaun hamutuk ho seitor privadu sira atu konstrui portu refere atu nune’e orsamentu bele preve no projetu refere bele lao.

Opsaun datoluk maka projetu balu ne’ebé implementa ona, governu seidauk selu, ne’e sai ona informasaun iha publiku hanesan projetu estrada emerjensia, projetu eletrisidade entaun orsamentu ne’ebé maka preve ba fundu enfra-estrutura la sufisiente atu selu, tanba ne’e maka governu presiza selu ida ne’e.

Orsamentu ratifikativu ne’ebé atu uza ba projetu bo’ot sira hanesan portu tibar, drainagen Dili no Suai Supplay base, ne’e hamutuk milaun $197.7, ne’e kuaze 50.7% hosi total orsamentu ratifikativu, ne’e signifika katak, orsamentu ratifikativu iha 50% maka aloka ba projetu bo’ot sira ne’e.

Entretantu observador politika hosi Universidade Nasionál Timor Lorosa’e (UNTL) Camilo Ximenes haktuir, ezekusaun orsamentu geral tinan 2016 kada ministeriu foin maka ezekuta to’o 30%, mas sei kontinua husu nafatin orsamentu ratifikativu atu halo saida.

Tanba ne’e Komisaun Anti Korupsaun (KAK), Provedória Direitus Humanus Justisa (PDHJ) tenke halo kontrolu didi’ak, selae orsamentu ratifikativu ne’e atu tama sala fali ba ema balun nia bolsu.

Governu nian razões hatete katak, hamosu orsamentu ratifikativu atu selu dívidas no koloka ba projetu bo’ot tolu hanesan Portu Tibar, Darinagen Dili no SuaiSupplay base.

“Hau konkorda ho deputadu Aurelio hodi hamosu perguntas ida hatete katak, keta halo hamosu osan ratifikativu iha interese ba fali buat seluk,”hatete nia.

Atu selu dívidas TT laos foin dau-daun, ne’e kleur ona komesa kedan tinan tolu ou ha’at, se nune’e nusa maka vontade V governu nian la tau osan hodi selu dívidas iha tinan 2013 ninian.

Entertantu Antes ne’e deputadu sira mós konfundu hodi atu lakohi konkorda diskuti orsamentu ratifikativu ne’ebé iha tanba ho razaun katak, ezekusaun ba orsamentu 2016 sidauk to’o iha 50% maibé atu fóti tan ona Orsamentu Ratifikativu.

Tuir Deputadu Osorio Florindo hosi Komisaun E ne’ebé trata ba asuntu Infra-Estrutura katak, Prosesu diskusaun bele la’o nafatin, maibé hanesan Parlamentu Nasionál mós la’os atu fóti liman de’it hodi aprova de’it bainhira projetu sira nia ezekusaun la fó benefisiu ba povu, tanbá ne’e sei hein rajaun hosi governu kona-ba husu aumenta orsamentu ratifikativu.

“Ha’u seidauk lee hotu orsamentu ratifikativu ne’ebé hosi Governu, maibé em prinsipiu orsamentu ne’e mai ba infra-estruturas de’it, Hau hanoin sei iha hela prosesu diskusaun hodi rona governu nia rajaun tanbá saida maka aumenta orsamentu ratifikativu ne’ebé tuir lolos sei iha klaran, ha’u lahatene sei iha tempu atu halo ezekusaun ka lae,”dehan Deputadu Osorio Florindo iha PN, Tersa, (05/07).

Pending Osan Ratifikativu Suai Suplay Base

Iha parte seluk,Diretór ezekutivu ONG Luta Hamutuk, Mericio Akara, ejiji ba Governu timor Leste atupendinglai orsamentu ratifikativu ba ejekusaun orsamentu Jeral ne’ebé maka tau ba iha mega projeitu Suai Suplay Base (SSB) tanba to’o Agora tribunal daskontas mós seidauk fó vistu atu aprova,

“Ami ejiji ba Governu atu pending lai orsamentu ratifika tivu ba orsamentu suai Suplay Base tanba laiha baze fundamentu tanba alokasaun hosi tinan fiskal 2015, tribunal da Kontas, ladauk fó Vistu ka Aprova,”afirma Akara ba Jornalista sira durante konferénsia imprensa iha edifisiu LH, Farol, Kuarta (13/07).

Akara hatete, Estadu mos labele kontinua aloka orasamentu ba Suai Suplay Base, tanba kompañia Hunday ne’ebé maka manan projetu ne’e retira tiha ona hodi intrega hikas projetu ne’e ba Governu nia liman.

Tuir Akara, Projetu ne’e hatudu katak ba governu liu liu iha ministériu Petróliu e Rekursu Naturais ne’e, hamutuk ho Timor GAP la  tau prioridade iha Indústria refere,

Tanba nee maka hosi sosiedade Sivil konsedera governu halo sala bo’ot ida, tanba ne’e atu husu Governu Presiza esplika ba Publiku hodi klarifika didi’ak rajaun fundamental retirasaun kompañia Hunday tanba projeitu ne’e nia impaktu ba orsamentu povu  ninian.

“Kazu ne’e Governu maka halo sala bo’ot liu tanba ne’e ejiji nafatin atu oinsa bele esplika ba publik hodi klarifika didi’ak, atu oinsa ita hotu bele hatene klean, tanba ne’e hosi osan sira ne’e osan povu ninian, la’os governu nia osan ka osan privadu ema ninian, tan ne’e mai husu di’ak liu estadupendingmaka di’ak,”tenik nia.

MPRM Tenke Esplika Projeitu Tasi Mane

Luta Hamutuk ejiji ba Parlamentu Nasionál atu bolu Ministériu Petróliu Rekursu Minerais (MPRM) hodi esplika progresu projetu tasi mane.

“Ami ejiji ba Parlamentu Nasionál atu bolu Ministru Petrolium Rekursu Minerai (MPRM) hodi esplika uluk progresu projetu tasi mane antes debate ba proposta orsamentu ratifikativu ba projetu tasi mane,”Informa Diretór Luta Hamutuk, Mericio Akara ba jornalista sira iha Farol, Dili, (13/07).

Luta Hamutuk konsidera, projetu tasi mane, liu-liu SSB para gasta de’it orsamentu estadu maibé iha prátika ne’e projetu lala’o entaun PN presiza bolu ministériu para klarifika didi’ak prosesu ne’e tomak.

“Ami husu  mós  ba  Parlamentu  Nasionál  “tetu  no  hare’e  didiak”, proposta Orsamentu  Jeral  do  Estado- Ratifikativu ne’ebé fó liu prioridades ba dezenvovle seitor Infrastrutura, antes halo aprovasaun, Seitor prioridades ne’e maka,  “Projeitu Tasi Mane(SSB, Refinery no planta LiquidNatural Gas (LNG) ne’ebé iha beasu”tanba projetu SSB nia planu la klaru no Kompania operador retira ona no lakohi kontinua opera projetu SSB,”hatete akara.(gus/rio/jxy/mj7/mj4)

Timor Post