Reinu Unidu sei hanesan nasaun ne'ebé afetadu liu iha ekonomia -Ifo

Reinu Unidu sei afetadu liu iha ekonomia tanba "Brexit", maski tenki hein atu nasaun sira seluk hosi Uniaun Europeia (UE), liuliu Irlanda, hetan mós impaktu negativu sira, haktuir hosi estudu ida ne'ebé fó sai iha loron-segunda ne'e.

Tuir hosi estudu ne'e, hosi institutu alemaun Ifo, halo ho baze hosi inkéritu sira ne'ebé hala'o durante fulan-Jullu ba analista hamutuk na'in 762 hosi nasaun 112, desizaun hosi Reinu Unidu hodi husik UE sei susar tebes hodi iha impaktu ekonómiku ruma iha Estadus Unidus, iha Médiu Oriente ka iha nasaun sira hosi Komunidade Estadu Independente sira (CEI).

Estudu hosi Ifo refere mós katak efeitu negativu maka'as sira iha tempu badak sei senti iha Europa hosi nasaun 15 ne'ebé hosi UE to'o loron 01 Maiu 2004, hanesan Alemaña, Áustria, Béljika, Dinamarka, España, Finlándia, Fransa, Grésia, Holanda, Irlanda, Itália, Luxemburgu, Portugal, Reinu Unidu ho Suésia.

Iha prazu médiu, entre tinan tolu to'o tinan lima, "Brexit" sei afeta negativu iha ekonomia sira UE nian, haktuir hosi estudu.

Estudu hosi institutu alemaun adianta katak efeitu negativu sira hosi desizaun britániku nian iha nasaun sira hosi Commonwealth sei fraku iha prazu badak no mós iha prazu médiu.

Ema britániku sira aprova ona iha referendu ida iha loron 23 Juñu saída hosi Reinu Unidu nian hosi UE (‘Brexit’).

SAPO TL ho Lusa