Tinan letivu iha Eskola Portugeza Díli nian hahú ho alunu na'in 900 resin

Tinan letivu iha Eskola Portugeza Díli nian hahú ofisial ona iha loron-tersa ne'e, ho alunu na'in 900 resin, barak liu alunu timoroan sira, iha tinan ne'ebé maka responsável sira hosi sentru edukativu hakarak aposta iha nia ampliasaun. 

Tanba ne'e maka aprezenta tiha ona proposta ida ba diresaun eskola nian, ho folin euro millaun rua, ne'ebé, sei hein aprovasaun, no sei permiti harii sala foun hamutuk 20 no auditóriu ida, hanesan esplika ona hosi diretór eskola ne'e, Acácio de Brito.

Nia esplika katak ne'e sei permiti "aumenta kapasidade hodi simu alunu foun sira", hodi nune'e bele hatán ba númeru aas hosi interese sira iha sosiedade timoroan nian.

Alunu foun sira simu tiha ona iha loron-sesta liubá maibé, hafoin loron feriadu relijiozu ida iha loron-segunda maka foin hahú iha loron-tersa ne'e aula sira iha eskola ida ne'ebé ema buka liu iha Timor-Leste no ne'ebé akumula lista naruk hodi hein hosi família hamutuk 700 resin.

Iha tinan ne'e hamutuk alunu na'in 200 maka tama iha pré-primáriu no na'in 700 entre tinan dahuluk to'o tinan 12 eskolaridade, ho diretór eskola Acácio de Brito destaka vontade hodi mantén sentru eskolar hanesan "fatin referénsia ba lian no kultura portugeza nian, ezijente iha propózitu sira, kualifikante no kualifikadór hosi rekursu ema sira nian".

SAPO TL ho Lusa