Tenista Timoroan Treinu iha NCAA-America

Sé hili ona tenista tenki fó ulun duni, serbisu maka’as, iha determinasaun atu nune’e bele hetan rezultadu ne’ebé maka di’ak.

Tenista timoroan ho kulit morena, fu’uk mulatuk, moris ho simples, kaer-metin ninia prinsípiu disiplina treinu be ás, lori teki ho naran  Kerry Pither Cristalina Galhos (Kerry Galhos) hetan bolus estudu hodi ba treinu no eskola iha National Collegiate Athletic Association (NCAA) iha Estadus Unidus Amérika (EUA).

Nia dehan, prosesu antes nia to’o iha Amérika maka uluk liu nia treina iha Timor durante tinan tolu (3) iha Liceu hodi aprend ehamutuk ho treinador voluntáriu ida hosi Austrália Ged Rapkins iha Federasaun Tenis Timor-Leste (FETTIL) nia okos durante semana ida.

“Kuandu ha’u sei tinan 13 reprezenta Timor iha Arafura Games, no hetan terseiru lugar iha kategoriasingle, no segundu lugar iha double. Depois de ida ne’e, ha’u mós ba iha Austrália kompete iha Brisban durante tina tolu (3), no dala barak mós sai vensedora iha kompetisaun sira ne’ebé ha’u tuir ba,” dehan Kerry ba Matadalan iha Largo Lesidere, Tersa (01/08/2016).

La’os ne’e de’it, iha Amérika fatin ne’ebé nia aprende no treina ba, daudaun ne’e mós hatudu rezultadu di’ak. Nia ho ninia team konsege manan Southland conference ba primeira vez—agora daudaun manan dala rua ona. Semester kotuk, ninia team ba joga iha torneu nasionál hasoru koléjiu sira hotu ne’ebé level as iha Amrérica no sira lakon iha ronde primeiru kontra ekipa Stanford University ne’ebé maka sai hanesan vensedor ba torneiu ne’e tomak.

“Ha’u mós hakarak teb-tebes tinan oin iha SEA Games, atu kompete hodi reprezenta Timor. No ha’u-nia mehi bo’ot liu maka bele kompete iha jogus olímpikus iha tinan 2020 mai,” nia haktuir.

Kona-ba apoiu ruma ne’ebé durante ne’e nia hetan maka, iha tinan 2012 bainhira ba iha Xina ho Indonézia Governu fó ajuda uituan no mós hosi Federasaun Tenis nian maibé maioria ne’e família maka responsabiliza hotu.

“Ba ha’u durante tinan sia (9) no agora 21 anos ona, se karik família la suporta ha’u maka sei la to’o ohin loron. Família nia favor no ajuda sira bainhira ami hasoru dezafiu ruma, sira sempre buka meius hodi rezolve atu ha’u bele realiza ha’u-nia mehi ne’e,” dehan oan hosi João Luciano Galhos no Maria Castro Galhos ne’ebé fans ba tenista Serene Wiliams ne’e.

Hanesan fanátiku ba desportu, nia pai mós sai hanesan motivador ida ba nia, no sempre hanorin tau disiplina ne’ebé as dezde nia sei ki’ik to’o agora. Nia haktuir nia aman nia liafuan, sé hili  ona tenista tenki fó ulun duni, serbisu maka’as, iha determinasaun atu nune’e bele hetan rezultadu ne’ebé maka di’ak.  (Jon/Mj1)

Matadalan