GOVERNU PROPOIN SUBSIDIU BA PARPOL U$ 6 MILLOENS

Governu liu husi Diskusaun Komite Revizaun Orsamentu propoin ona orsamentu U$6 milloens hodi fo subsidiu ba Partidu Politiku (ParPol) ne’ebé maka  hetan asentu iha Parlamentu Nasional (PN).

“Ita tau osan ho montante U$6 milloes ba Partidu Politiku (ParPol) ne’ebé maka hetan asentu iha Parlamentu Nasional (PN),”esplika Vise Ministru Finansas (MF) Helder Lopes ba jornalista sira, iha Palasiu Governu, Tersa, (13/9).

Nia hatutan, ParPol sira hetan asentu iha PN maka hanesan Partidu Frente Revolusionario Independente de Timor Leste (FRETILIN), Partidu Congresso Nacional de Reconstrucção de Timorense (CNRT), Partido Democratico (PD) no Partidu Frente Mudança (FM).

Vise Ministru Helder Lopes haktuir, Governu sei la tau osan ba ParPol sira foun ne’ebé mak foin ezisti.

Nia hatutan,  osan U$ 6 milloens ne’ebé Governu atu fo subsidiu ba ParPol sira  ne’e, la’os atu uza ba halo kampaña.

Iha sorin seluk, Prezidenti Komisaun C Asuntu Finansas Publikas, husi Bankada CNRT, Igilda Soares dehan, Governu aloka duni orsamentu ba Partidu sira, maibe partidu sira ne’ebé simu ne’e hafoin hetan asentu iha PN.

Nia dehan, ParPol ne’ebé maka hetan tiha asentu iha PN maka bele hetan subsídiu, maibe ParPol sira ne’ebé maka la hetan asentu iha PN sei la simu subsídiu, no fila-fali ba kofre Estadu.

ParPol hat ne’ebé maka hetan asentu iha Parlamentu Nasional ne’e Partidu CNRT maka bo’ot liu.

Nune’e mos, Xefi Bankada FRETILIN, Aniceto Guterres, hatete,  hodi kumpri lei ne’ebé mak iha ona kada tinan Governu sempre aloka orsamentu ba PaPol sira.

“Kona-ba partidu FRETILIN nian hira,  imi rasik ba husu iha Sede Partidu deit, ha’u ladun hatene kona ba ninia montante,” esplika Aniceito Guterres.avi

Jornal Nacional