Hamosu Kondisaun ba Labarik Sira

DILI, (ANTIL) – Xefe Governu husu ba ema boot sira atu iha responsabilidade hodi hamosu kondisaun, fó apoiu no enkoraja labarik sira ho sira ida-idak ninia família, husik sira ba eskola, halimar tuir idade no husu atu ajuda iha serbisu uma-laran tuir idade permite, nune’e bele prepara didi’ak sira ba loron aban-bain-rua.

“Mai ita hotu respeita labarik sira nia direitu. Ida ba hotu! Hotu-hotu ba ida!”, Primeiru Ministru, Rui Maria Araújo hatete liuhusi mensajen ofisiál iha Palásiu Governu ne’ebé ANTIL asesu, Segunda (21/11) katak labarik mak fatór determinante iha sustentabilidade, ka sira mak sei hatutan moris iha família, sosiedade no nasaun Timor-Leste.

Mensajen ba komemorasaun loron labarik nian tinan ne’e ho tema “Hamutuk Ita Kombate Tráfiku no Traballu Infantil”, Xefe Governu hatutan, ita hotu-hotu no ita ida-idak, tenke haka’as-án kontribui hodi responde ba realidade ne’ebé hatudu, sei iha labarik barak ne’ebé sai objetu tranzasaun entre ema boot sira.

Nune’e mós, sei iha labarik barak mak tenke hala’o serbisu hanesan kuru-bé, hili-ai, serbisu iha to’os no natar, hein karau, hein bibi, fa’an-sasan iha merkadu, no seluk-seluk tan, serbisu hirak ne’ebé tuir loloos sai nu’udar ema boot ninia kna’ar no responsabilidade.

Komemorasaun loron labarik nian universalmente mak iha 20 Novembru. Enkuantu direitu labarik nomós protesaun ba labarik sira konsagra ona iha lei inan, konstituisaun Repúblika Demokrátika Timor-Leste (RDTL) artigu 18o. Konvensaun direitu labarik nian governu Timor-Leste asina tiha ona iha 2002. (jornalista: Rafy Belo; editora: Rita Almeida)

Foto: Ilustrasaun labarik sira nian direitu. Foto espesiál