HARII UMA SIDADANIA, ACTTL HUSU AJUDA F-FDTL

Dili – Atu harii uma sidadania iha Suku Biqueli, Postu Administrativu Atau­ro, Munisipiu Dili, Aso­siasaun Conjugas Titurales Timor-Leste (ACTTL) husu ajuda Falintil Forsa Defeza Timor Leste (F-FDTL) liu-liu iha parte enjenaria ninian.

Prezidente ACTTL atual Primeira Dama Timor-Leste, Isabel Ferreira marka prezensa iha Kuartel Jeral F-FDTL hodi husu ajuda ba instituisaun F-FDTL atu bele halo kontrusaun ba uma sidadania iha Suku Biqueli.

“Hau mai hasoru malu ho Xefe Estadu Maior Jeneral F-FDTL, Maijor Jeneral Lere Anan Timur atu husu apoiu forsa husi parte enjineira nian hodi halo kontrusaun ba uma sida­dania,” dehan Isabel ba jornalista, Kinta (09/04/2015) iha Kuartel Jeral F-FDTL, Fatuhada-Dili.

Nia haktuir, uma ba sidadania halo ona lansamentu fatuk dahuluk iha Biqueli iha loron 28 fulan Marsu foin lalais nee.

Tuir Isabel, Xefe Estadu Major Jeneral F-FDTL, Lere Anan Timur fo apoiu makaas.  Tanba nee sei akompanha husi Prezidente ACTTL rasik ho forsa enjenaria sira hodi ba halo levantamentu hafoin bele halo kontrusaun.

Diskuti Promosaun Tran­zitoriu

Iha parte seluk Prezidente Komisaun Tekniku Promo­saun Polisia Nasional Timor-Leste (PNTL) atual Primeira Dama, Isabel Ferreira mos hasoru malu ho Komisariu PNTL, Julio Hornai hodi koa­lia kona ba programa PNTL nian iha futuru.

“Ami koalia kona ba baze de dadus PNTL nian tanba ita hotu hatene katak iha tinan 2009, kuandu prepara halo promosaun tranzitoriu baze de dadus hotu iha komisaun. Tan nee ba futuru bele transferensia baze de dadus nee iha departamentu rekursu umanus PNTL,” katak Isabel.

Nia hanoin, tinan oin tenke iha promosaun postu balun tanba tempu too ona hodi priense vaga sira nebe mamuk no koalia kona-ba lei estututu PNTL nian nebe mak se­i­da­uk iha too agora, nomos halo revi­zaun ba lei organika PNTL nian. Timotio Gusmão

Suara Timor Lorosae