Operasaun Hanita, Kaptura Membru Mauk Moruk 213

Dili, Radio Online, Operasaun HANITA ne’ebe hahu iha fulan Marsu tinan ne’e(2015) ate agora, konsege kaptura ona membru grupu ilegais Konselho Revolusionariu Maubere(KRK) hamutuk 213, dehan Komandante Jeral Polisia Nasional Timor-Leste(PNTL) Julio Hornai, iha nia knaar fatin Kuartel Jeral PNTL Kaikoli Dili, Kinta 9/4/2015.

Komjer Julio Hornai esplika, “Pessoal husi membru KRM 213 ne’ebe mak Komando Operasaun  Konjunta(KOK) konsege kaptura, Mane hamutuk 202, Feto nain 11, prizaun preventiva iha nain 3, aplika TIR nain 8, no seluk identifikasaun 12 oras, signifika restu fila fali ba sira nia uma”.

Julio imforma tan, Operasaun ne’ebe dadaun halao, difisil tebes,  presija mos povu hotu apoiu, operasaun ne’e bele sussesu, “ Ita hotu hakarak ita nia rai ne’e moris iha dame no paz nia laran, atu nune’e governu no Povu hotu-hotu halao aktividade lorloron nian ho ambiente ne’ebe hamatek iha paz no Dame nia laran”dehan Julio.

Hornai esplika liu tan, konaba prekupasaun sira ne’ebe mosu iha sosiedade sira nia leet, katak iha membru KOK balun halo torturasaun  hasoru populasaun balun iha area operasaun nian, Komjer PNTL seidauk simu relatoriu konaba asuntu ida ne’e, “ too oras ne’e relatoriu konaba torturasaun (siksa) ou baku komunidade sira iha area operasaun  ne’e seidauk too mai  iha hau nia meja”, imforma Julio.

Julio Rejeita KOK ho Membru Mauk Moruk Tiru Malu

Dili, Radio Online, Laiha tiru malu entre membru Konsellu Revolusionariu Maubere (KRM) iha Selegua Baukau, dehan Komandante Jeral Polisia Nasional Timor-Leste(PNTL) Komisariu Julio Hornai iha nia knaar fatin Kuartel PNTL Kaikoli,  Kinta 9/4/15).

Komandante Jeral Polisia Nasional Timor-Leste Komisariu Julio Hornai esplika katak, iha Selegua Baukau, laiha tiru malu entre KOK ho membru Mauk Moruk, hanesan imformasaun ne’ebe espalla ba Publiku.

“Laiha tiru malu tamba relatoriu ne’ebe mai iha ami nia komando ne’e  seidauk relata dehan tiru malu entre grupu hostis ho pessoal Operasaun iha Selegua Baukau”, imforma Komisariu Julio.

Julio esplika tan, KOK tiru sae deit ba leten, atu nune’e membru KRM sira  labele halai  no rende ou entrega an deit, maibe laos tiru malu entre grupu rua ne’e.

“Membru KRM ida ne’ebe kanek, tamba hakfodak ho tiru no monu mak hetan kanek, maibe laos tan tiru mak kanek”, dehan Julio.

Julio realsa tan, KOK mos tenke defende an, kuandu iha operasaun mak ema ruma halo violensia hasoru, “ne’e iha posibilidade no Lei mos fo dalan para ita atu defende ita nia an, wainhira iha ema ruma kontra servisu seguransa ou halo violensia hasoru autoridade seguransa”, tenik Julio.

Fatima Afonso – Rádio Liberdade Dili