FFTL FO TREINAMENTU BA 25 TREINADOR ASSOSIASAUN MUNISIPIU 13

DILI - Federasaun Futebol Timor-Leste (FFTL) kontinua servisu hamutuk ho FIFA, hodi fo kapasitasaun ba treinador  nain 25 husi assosiasaun  munisipiu 13, no treinamentu ne’e halao durante loron lima hahu husi dia (13 -18) foin lalais ne’e. Sekretaria jeral FFTL, Amandio Sarmentu hatete, treinamentu ne’e kontinuasaun ba treinador sira hodi aumenta tan sira nia abilidade, tanba Timor-Leste iha ona planu fiksu hodi implementa jogu domestiku iha 13 munisipiu.

“Ne’e dunik ba  ema ne’ebé hakarak atu kaer ekipa ou klubu kriteria tenki iha sertifikadu  konhesementu husi federasaun molok sai treinador, atu nune’e bele iha lisensa husi federasaun tanba ida ne’e mak baze,”dehan Amandio. Amandio hatutan  treinador hirak ne’e mai husi husi assosiasaun munisipiu 13 no kada assosiasaun ida-idak delega ema nain rua hodi partisipa iha treinamentu ne’ebé halao husi Treinador Struktura FIFA, Mohamed Basir husi nasaun Arabia.

Amandio reafirma, durante ne’e federasaun servisu hamutuk ho FIFA konsege produs ona treinador Timor-Leste hamutuk  atus rua resin kompostu husi, nivel D no C. “Durante ne’e ita nunka iha turnamentu reguler ida hodi akumula jogador tomak iha 13 munisipiu, ne’e mak to ohin loron jogador selesaun nasional kuaze mai husi Distritu Dili, ne’e dunik agora federasaun tenta ona atu implementa turnamentu ida maske agora ita seidauk bele uja klubu maibe assosiasaun ida-idak bele reprejenta ekipa hodi kompete iha eventu reguler ne’e,  atu nune’e federasaun bele buka ona fini hodi prepara ba selesaun nasional,  tanba federasaun rekonhese  jogador Munisipiu iha talentu barak,”dehan Sekretaria Geral ba Jornalista BT iha salaun Xanana Sport Center, segunda (13/04).

Nia imforma, treinamentu ida ne’e sei halao durante loron lima komesa husi dia 13-18 fulan ne’e, iha treinamentu ne’e treinador sira sei aprende teoria nomos pratika atu nune’e bele fo motivasaun ba sira wainhira kaer ekipa/klubu. Entertantu iha treinamentu ne’e FFTL hetan apoiu finanseiru husi FIFA , hodi subtitui ba treinamentu inklui fasilita treinador no partisipantes sira, ho montante orsamentu ho total (oitu ate dez mill dollar amerika).

Iha fatin hanesan partisipantes treinador  Assosiasaun Munisipiu Dili, klubu (Dili Oeste) Jaime Andre Simoes hatete, nia agredese tanba FFTL bele servisu hamutuk ho FIFA hodi fo treinamentu ida ne’e, para eleva tan sira nia konhesementu iha area futebol, hodi bele sai treinador ida ne’ebé diak hodi dezenvolve desportu iha Timor-Leste. Entertantu Treinador Struktur FIFA Mohamed Basir, husu ba partisipantes sira atu uja oportunidade ida ne’e ho diak, hodi hasae tan sira nia abilidade iha desportu tanba treinamentu ida ne’e importante ba treinador Timor-Leste. (BT)

Business Timor