EMA BALU APOIU MAUK MORUK

DILI - Hafoin Parlamentu Nasional la konsege lori Mauk Moruk kopera ho justisa liu husi rezulusaun neebe ezekuta husi F-FDTL no PNTL.

Deputadu sira iha uma fukun nee hahu lansa fali propaganda ida konaba apoiu ba ema balu nian ba Mauk Moruk ho nia grupu. Tamba Operasaun lao ona fulan tolu, laiha rezultadu.

“Se Mauk Moruk mesak, balu la apoia nia, oras nee kaer tiha ona, mas iha ema ida rua maka iha kotuk, dudu nafatin nia, ita atu kaer mos sei defisil oit­uan,”dehan Deputadu Do­min­gos Carvalho de Araujo ba STL iha PN, Dili, Tersa (28/07/2019). Operasaun konjunta ba Mauk Moruk, bele konsidera faila noi mosu ona ezijensia husi kamada sosial balu katak opera­saun konjunta laiha rezultadu, diak liu retira, tamba gasta osan ba operasaun, mas laiha rezul­tadu. Forsa sira nee soe sira nia fen ho oan, polisia sira mos soe sira nia fen ho oan atu ba kaer ema ida deit, mas na realidade to kuaze sai bateliaun hira mak tun tiha hotu ona to agora Mauk Moruk labele kaer, labele kaer tamba iha ema balu apoia hela husi kotuk oinsa mak ita bele kaer,” dehan Domingos.

Deputadu nee dehan Mauk Moruk oras nee han, hemu diak iha fatin ruma, tesi lia kapaas ho nia aliadu sira, mas kiik oan sira toba iha maho ben laran no se loron ba halo operasaun.

“To agora nee ita nia forsa sira labele deteta paradeiru, nee keta halo Mauk Moruk hemu diak, han diak hela ho ema ruma,” komenta Deputadu Domingos.

Iha fatin hanesan Membru Komisaun B Parlamentu Nasio­nal, trata asuntu Defesa i Segu­ransa, Cesar Valente hatete, Mauk Moruk bele han no toba diak iha fatin ruma, maibe kiik oan sira maka ema buka no baku tun sae. “Mauk Moruk dalaruma nia han toba hemu diak hela iha fatin ruma, kiik oan sira nee maka vidu ba mai halo ema baku tun sae hela, neebe se maka hakarak hamosu konflitu iha ita nia Nasaun, nia tenki hasoru Polisia no Forsa Armadas, labele halo povu maka sai vitima,” dehan deputadu Cesar.

Nunee mos membru Ko­misaun B Parlamentu Nasional, Jacinto Viegas hatete, KOK sei seo lori tempu naruk hodi kaer Mauk Moruk, tan  nee pasiensia oituan,  lideransa sira oras nee buka hela meius seluk rezolve problema Mauk Moruk nian liu husi dalan paz,  tamba  lakohi povu iha nasaun fakar ran tan.Carme Ximenes

Suara Timor Lorosae