António Guterres sei la husu prolongamentu ba mandatu iha UNHCR

Antigu primeiru-ministru portugés eleitu ba kargu ne'e iha fulan-Juñu 2005 no hafoin ne'e eleitu fali ba tinan lima ba mandatu daruak.

António Guterres sei la tenta prolongamentu ka renovasaun ba nia mandatu nu'udar komisáriu aas hosi Nasaun Unidu nian ba Refujiadu sira. Esklaresimentu ne'e halo ba ajénsia Reuters hosi porta-vós UNHCR nian.

Tuir Melissa Fleming, Guterres sei la husu tan prolongamentu ba mandatu ne'e no, tuir regra sira hosi ONU, laiha posibilidade ba reeleisaun ida.

Antigu primeiru-ministru portugés eleitu ba kargu ne'e iha fulan-Juñu 2005 no hafoin ne'e eleitu fali ba tinan lima. Nia mandatu ikus hotu iha fulan-Juñu maibé iha fulan-Fevereiru aumenta fali to'o tinan ne'e nia rohan tanba desizaun hosi Asembleia Jerál ONU nian.

Prolongamentu hosi mandatu ne'e justifika tanba aumentu númeru refujiadu sira iha mundu tomak, liuliu iha Médiu Oriente no iha Áfrika. Iha tempu ne'ebá, sekretáriu-jerál ONU nian, nebe apoia hosi nasaun barak, hatete katak Guterres kontinua iha kargu to'o tinan ne'e nia rohan hodi nune'e UNHCR bele funsiona lahó interupsaun.

Eis-primeira-ministra dinamarkés aprezenta ona, iha loron-sesta ne'e, kandidatura hodi troka António Guterres iha kargu ne'e. Helle Thorning-Schmidt, ho tinan 48, diriji ona ezekutivu dinamarkés entre tinan 2011 no 2015, no lidera ona Partidu Sosiál-Demokrata durante dékada ida, knaar nebe nia husik iha kalan ida bainhira nia lakon eleisaun.

SAPO TL ho Renascença