Migrante sira halai hosi kampu. Feto ho labarik sira la'o ba Áustria

Autoridade húngaru sira hapara ona refujiadu rihun 150 resin nebe maka mai hosi nasaun sira nebe iha konflitu no, barak liu, hakarak kontinua viajen ba nasaun sira riku liu iha Europa.

Iha loron nebe Parlamentu húngaru aprova ona pakote lejislativu ida hodi hametin fronteira sira no kontrolu ba migrante sira, mosu konflitu iha kampu rua.

Grupu ida ho ema na'in 64 halai hosi kampu akollimentu ida besik iha sidade Bicske. Ema balun hatete ba polísia katak karik komboiu laiha autorizasaun atu sai, feto ho labarik sira hosi grupu ne'e sei tenta la'o hodi to'o iha Áustria.

Iha Budapeste, fotógrafu hosi ajénsia Reuters haree ona katak refujiadu atus resin, nebe konsentradu iha estasaun prinsipál komboiu nian iha sidade, hahú la'o ona ho destinu nebe hanesan.

Migrante rihun rua resin nebe iha ona kampu besik fronteira ho Sérvia ameasa mós hodi husik fatin ne'e bainhira sira nia ezijénsia ema la halo tuir. Maibé, ema na'in 300 konsege eskapa ona.

Tanba regra foun, nebe iha loron-sesta ne'e hahú ona, aumenta ona autoridade ba polísia nasionál no sé maka atravesa ilegál fronteira sei hetan kastigu kadeia to'o tinan tolu.

Autoridade húngaru sira hapara ona refujiadu rihun 150 resin nebe maka mai hosi nasaun sira nebe iha konflitu no, barak liu, hakarak kontinua viajen ba nasaun sira riku liu iha Europa.

Rekord ida ho migrante na'in 5.600 resin tama ona iha loron-kinta iha Masedónia liuhosi Grésia, númeru nebe aas liu baibain nebe entre ema na'in 2.000 to'o 3.000, haktuir hosi ONU.

Dalabarak grupu migrante sira hahú tuun iha fulan-Outubru tanba tempu nebe ladi'ak iha Mediteráneu, maibé, tuir esplika hosi porta-vós Komisariadu Aas hosi Nasaun Unidu nian ba Refujiadu sira (UNHCR), Melissa Fleming, katak iha tinan liubá númeru sira mantén aas maski ho kondisaun sira ne'e.

Migrante ho refujiadu sira na'in 365.000 atravesa ona Mediteráneu hahú fulan-Janeiru no na'in 2.700 resin mate ona, haktuir hosi informasaun sira nebe atualizadu hosi Organizasaun Internasionál ba Migrasaun sira. Na'in 245.000 resin to' ona iha Grésia no na'in 116.000 resin to'o iha Itália.

SAPO TL ho Renascença