GOVERNU-PJR TENKI JUSTIFIKA KAZU PSIK

DILI - Eis Diretór  Nasional Polísia  Siéntifiku Investigativu Kriminal (PSIK), Hermenegildo da Cruz husu Governu no Prokuradoria Jeral Repúblika hodi hatudu faktus sobre kazu ne’ebé nia komete hodi hasai nia hosi kargu refere.

Eis Diretór  PSIK  ne’e hatete, la konkorda ho desizaun polítika  hosi Konselhu Superior nian tanba deklarasaun ne’ebé iha katak hasai nia hosi Diretór  PSIK  tanba  komete iregularidade graves no la obedese ka la respeita superior sira.

“Ha’u la konkorda ho akuzasaun sira ne’ebé dehan katak ha’u komete iregularidades graves, iregularidades graves ne’e sira tenki justifika, iregularidade graves ne’e mak to’o iha ne’ebé i depois iha fali públiku dehan katak ha’u komete insubrinisaun, entaun iha ne’eba laiha faktu ida,” eis Diretór  PSIK , Hermenegildo da Cruz informa ba jornalista sira iha Palacio Prezidensial Bairo Pite-Dili, Kuarta, (30/09) hafoin hato’o kazu ne’e ba Prezidente Repúblika (PR), Taur Matan Ruak.

Eis Diretór  PSIK  ne’e konsidera la respeita superior ne’e tenki hatudu faktus tanba durante nia asumi knar hanesan Diretór  PSIK  servisu hotu PSIK  nian PSIK  relata ba Ministru Justisa (MJ).

Nia hatutan kazu ne’ebé mak PSIK  atende no halo investigasaun ne’e hamutuk kazu 24, no rejista ona iha Ministerio Públiku (MP) tanba ne’e kona-ba la respeita ne’e laiha.

Maibé  eis Diretór  PSIK  ne’e la konkorda ho estratejia ne’ebé mak MJ, Ivo Valente halo hodi hakloot fali PSIK  nia kompeténsia.

“Ha’u la konkorda ho estratejia ne’ebé Ministru Justisa halo hodi hakloot fali PSIK  nia kompeténsia  iha artigu 2 dehan katak PSIK  ne’e korpu superior polísia  criminal ne’ebé iha autonomu administrativu i finanseiru, estratejia ne’e mak ha’u la konkorda,”Hermenegildo relata.

Aliende ne’e nia parte mós la konkorda estratejia MJ, Ivo Valente nian hodi esklui tiha Diretór  Nasional PSIK  hosi Konselhu Sperior, iha dia 9 de Agostu liu ba ne’e mós eis Diretór  PSIK  ne’e la konkorda tanba, estratejia laloos, la tuir dalan no la tuir lei tanba ne’e nia la konkorda maibé , la signifika la respeita.

Kazu ne’e mós eis Diretór  Nasional PSIK  hato’o ona ba Prezidente Tribunal Rekursu (TR) no Prokuradoria dos Direitus Humanus no Justisa (PDHJ) hodi haree ba asuntu ida ne’e, depois mak TR no PDHJ bele foti desizaun.

“Ha’u hato’o ona ha’u kazu ne’e ba Tribunal Rekursu, hato’o kronologia tomak ona-ba saida mak iha, hato’o ba Provedor Direitus Humansu depois ita hein Tribunal Rekursu no Provedor Direitu Humanus Justisa nia rezultadu sai ne’e halo nusa,”nia hatete.

Hanesan superior Polísia  Nasional Timor-Leste (PNTL), informa kronologia loloos kazu PSIK  nian ne’e ba xefe estadu, Taur Matan Ruak hanesan Komandante Supremu das Forsas hodi nune’e xefe estadu mós iha informasaun ne’ebé klaru hodi akompania kazu ne’e.

“Ha’u mai informa ba Prezidente para Prezidente hatene didi’ak saida mak ha’u infrenta, hanesan xefe estadu nia iha preokupasaun ba kazu ida ne’e para nune’e hatene didi’ak ida ne’e,”dehan nia.

Hafoin desizaun politiku governu nian liu hosi Konselhu Superior PSIK  nian sai katak hasai Diretór  Nasional PSIK , hanesan superior PNTL nian, nia fila ona ba Kuartel Jeral PNTL hein desizaun foun hosi Komadante Jeral no Segundu Komadante Jeral PNTL para hala’o fali knar hanesan superior PNTL nian.

“Desizaun polítika  sai ona, ha’u fila ba kuartel jeral PNTL i hala’o servisu PNTL bainhira Komandante Jeral ho Segundu Komandante Jeral sira halo desizaun,”dehan nia.

Nia hatete kargu PSIK  nian ne’e hanesan kargu politiku tanba ne’e politiku mak tenki foti desizaun ne’e loos no eis Diretór  Nasional PSIK  ne’e fila ona ba Kuartel Jeral PNTL tanba nia efetivu polísia  nafatin.(dgx)

Timor Post