HILI BUSA IHA KARON LARAN

Relasiona ho kampaña eleitoral iha tinan 2012 liu ba Pensaun vitalísia hanesan promesa falsu ne’ebé deputadu sira halo, tanba ne’e Diretór Ezekutivu FONGTIL interpreta povu hili ParPol (Partidu Polítika) sira hanesan hili busa iha karon laran.

FONGTIL  apoia estudante halo demonstrasaun hodi ejize ba Parlamentu Nasionál, nune’e halo revizaun ka altera tiha lei pensaun vitalísia.

 “Demokrasia ne’e hili Partidu Polítika, sira (deputadu) dehan katak ha’u (deputadu) hili duni hosi povu, klaru katak ita povu sira ne’e hotu hili, tanba ne’e hanesan ita hili busa iha karon laran, tanba ejizensia hosi povu, universitariu, sosiedade sivíl, tenke rona,”Diretór Ezekutivu FONGTIL, Arsenio Pereira informa iha nia kna’ar fatin, Kuarta (30/9).

Diretór FONGTIL ne’e halo na sorumutuk ho Prezidente Repúblika, Taur Matan Ruak, iha loron Segunda (29/9) preokupadu lei pensaun vitalísia ne’e.

“Xefe Estadu rasik mós hatete dehan katak sé lei ne’e la muda, partidu polítik sira iha parlamentu ne’e falla ka gagal, nia (Xefe Estadu) hatete hanesan ne’e,” haktuir Diretór FONGTIL ne’e.

Tanba ne’e, nia husu ba deputadu sira iha Uma Fukun Parlamentu Nasionál tenke iha konsiénsia  moral, iha espíritu  nasionalizmu, hodi hatudu katak ha’u (Deputadu) servi povu ne’e la’os tan de’it osan, maibé ha’u servi rai ida ne’e ho konsiénsia ,”Lamenta Arsenio Pereira.

Nune’e mós Parlamentu Nasionál la tau prioridade lei Antí Korrupsaun inklui lei ba rai ne’ebé oras ne’e sai preokupasaun bo’ot.

Maski hanoin balun hatete katak lei pensaun vitalísia la’os asuntu urjensia, maibé Diretór Ezekutivu FONGTIL ne’e rezeita, tanba tuir loloos uma fukun ne’ebé lidera hosi Vicente Guterres tenke tau ona ajenda.

“Pozisaun FONGTIL nian klaru, ami suporta katak tenke halo duni demonstrasaun, tanba ita haree katak Parlamentu Nasionál ne’e tilun ne’e di’ak. Sira nunka hanoin katak ejizensia povu nian, tanba sira rasik ta’u a’an reprezenta povu, maibé tuir loloos sira la’os reprezenta povu, sira ne’e reprezenta partidu polítiku, tanba sira ne’e hili liu hosi Partidu Polítika,”tenik nia.(fer/vas)

Timor Post