LAIHA KOMPENSASAUN BA OKUPANTE PROPRIEDADE ESTADU

DILI - Ministru Justisa, Ivo Valente afirma, okupante hotu ne’ebé hela iha propriedade estadu liuliu rai no uma sei la hetan kompensasaun bainhira governu haruka sai.

       

Ba Timor Post iha Palásiu  Governu, Tersa (17/05) Valente hatete, ba okupante sira ne’ebé iha venklu legal, katak antes sira okupa propriedade  estadu hanesan uma ho rai hetan lisensa hosi governu, no sira selu arendamentu ba governu kada fulan.  Automatikamente  governu sei konsidera sira hetan kompesasaun tuir lei, maibé okupa laiha lisensia  hosi governu,  sira la hetan  kompesasaun.

Governu halo dadauk identifikasaun ba propriedade estadu iha rai laran liuliu iha Dili. No bainhira de’it governu presiza atu uza okupante sira tenke husik mamuk.

“Agora governu sei hein hela lei rai ne’ebé iha ona meja Parlamentu Nasionál, bainhira hetan ona aprovasaun no promulga iha Prezidente Republika, governu sei bazeia ba lei refere hodi halo despeisu ba propriedade  estadu sira,” hatutan Valente.

Iha semana kotuk Ministériu Justisa liuhosi Sekretária Estadu Terras no Propriedades (SETP) fó ona karta notifikasaun ba okupante uma kain 18 iha Aspol, iha edifísiu Ministériu Solidariedade Sosiál (MSS) nia kotuk.

PN Prioridade Lei Rai

Entretantu Prezidente Parlamentu Nasional (PN), Adérito Hugo da Costa fó ona prioridade ba lei rai hodi halo ona ajenda iha loron 17/05 hodi baixa ba komisaun A no D kona-ba  lejislasaun proposta de lei 3 ne’ebé submisaun direita hosi Primeru Ministru, Rui Maria de Araújo  ba PN iha loron hira liu ba.

Hugo haktuir, submisaun PM nian ne’e kona-ba  lei 3 hanesan, proposta lei númeru  36/3 Rezime espesial para definisaun de titulares dos Bens no moves, Proposta de lei númeru  37/3 Esproprisaun pur utilidade publikas no Proposta de lei númeru  38/3 Ordenamentu de teritóriu.

Proposta lei tolu ne’e inklui Lei númeru  36/3 no 37/7 mak kaduka ona iha II lejislatura no lakonsege halo konfirmasaun de votus tanba iha momentu veta polítika  ne’ebé Eis Prezidente Republika Ramos Horta halo iha ultima mandatu  2012 nian.

“Ami tau mós Proposta Lei tolu ne’e hanesan prioridade, par depois posibel halo aprovasaun antes de resesus dia 15 de julho,”dehan Prezidente PN, Adérito  Hugo iha PN, Tersa (17/05).

Iha fatin hanesan, Deputadu Arão Noe Amaral hosi  Komisaun A ne’ebé trata ba asuntu Lei hatutan, Prezidente PN abaixa ona Lei Pakote ida kona-ba  Lei rai nian, pakote ne’e lei Rai, Espropriasaun, Fundu de espropriasaun no Ordenamentu Teritóriu.

Alende ne’e nia dehan, Lei suku nian sidauk konklui mais sei halo esforsu par halo hotu tia lei suku iha semana ida ne’e par hein semana oin bele audensia ona ba lei rai ninian.

“Ami fó prioridade liu ba lei rai ninian, tanba ita hare problema barak komesa mosu barak tanba rai, ne’e tanba estatutu rai sidauk klaru, adves mos Tribunal naran halo despesu administrativus tun sa’e  hodi duni ema maske ema balun iha direitu hela, mais ita sidauk iha lei no kaer hela lei anterior mak sai baze hodi halo desizaun tribunal sira nian,”hatutan Deputadu Arão Noe iha PN, Tersa (17/05).

Tan ne’e nia dehan, sira komisaun A ne’ebé trata asuntu rai sei fo prioridade ba ida ne’e hodi bele hotu iha fulan ida nia laran antes tama ba debate orsamente iha fulan Outobru. (max/lj49/rio)

Timor Post