Prezidente turku hanoin estabelese fali kastigu mate nian hafoin tentativa golpe

Prezidente turku, Recep Erdogan, hatete iha loron-domingu katak hanoin hela atu estabelese fali kastigu mate nian hafoin tentativa golpe Estadu nian ne'ebé falla.

"Bainhira hanesan governu, hanesan Estadu, ami hatete no rona asaun ne'e", prezidente hatán ba multidaun partidáriu sira ne'ebé husu kastigu mate ba ema sira ne'ebé envolve iha tentativa golpe Estadu ne'ebé akontese iha loron-sesta liubá, 15 Jullu, no hanaruk to'o loron-sábadu madrugada.

"Iha demokrasia sira, desizaun bazeia iha povu nia liafuan. Ha'u fiar katak ita nia governu sei ko'alia ho opozisaun no sei hetan desizaun ida", Erdogan hatete. "Ita labele atraza desizaun ne'e, tanba iha nasaun ne'e sei ne'ebé hakarak halo golpe ida iha Estadu tenki iha obrigasaun hodi selu", nia hatutan.

Bainhira estabelese kastigu mate nian iha Turkia sei kontra kritériu sira hosi adezaun Ankara nian ba Uniaun Europeia (UE). Diskusaun sira ho Bruxelas paradu iha tinan barak nia laran.

Iha loron-sesta kalan Turkia sai hetan tentativa ida golpe Estadu nian maibé primeiru-ministru turku, Binali Yildirim, afirma ona katak situasaun iha nasaun "iha ona kontrolu nia laran".

Balansu ikus aponta ba na'in 161 mate entre ema sivil no forsa leal sira ba prezidente turku, Recep Erdogan, na'in 1.440 kanek no kaer ona militar revoltozu sira hamutuk na'in 2.839.

Yildirim adianta ona katak militar revoltozu na'in 20 mate ona bainhira akontese tentativa golpe Estadu nian, númeru ne'ebé la hanesan ho balansu dahuluk ne'ebé avansa hosi Forsa Armada sira, ne'ebé aponta ba militar revoltozu ne'ebé hamutuk na'in 104 maka mate iha forsa leal sira ba prezidente Erdogan nia liman laran.

Iha Turkia hala'o daudaun limpeza ida. Tuir ministru justisa turku nian, Bekir Bozdag, kaer ona ema rihun neen hafoin golpe. Iha tempu hanesan, demiti ona juís hamutuk rihun rua resin.

SAPO TL ho SAPO24