Ajente PNTL Sei Hetan Konsekuénsia Todan

DILI, (ANTIL) – Komandante Jerál Polísia Nasionál Timor-Leste (PNTL), Komisariu Júlio da Costa Hornay deklara, membru PNTL sé de’it maka halo problema sei hetan konsekuénsia todan.

“Sé ajente ida ka soldadu ida hakarak koko nafatin baku malu, nia prontu simu konsekuénsia rua. Kriminál, nia simu desizaun iha tribunál. Disiplinár, nia simu prosesu disiplinár hosi instituisaun PNTL. Tanba ne’e, laiha ema ida sees hosi prosesu,” Júlio esplika ba jornalista sira iha Palásiu Prezidénsia Repúblika, Bairu-Pité, Kinta (25/8), relasiona ho konflitu entre oknum PNTL no F-FDTL, foin lalais ne’e.

Nia informa, oras-ne’e prosesu ba akontesementu ne’e la’o hela, tantu iha Laulara, Ainaro no Bobonaro. “Prosesu investigasaun ba kazu ne’e la’o hela. Investigadór sira mai hosi F-FDTL no PNTL,” nia dehan.

Oras-ne’e hein hela rezultadu investigasaun no hein mós prosesu kriminál hosi Ministériu Públiku, atu lori ba prosesu tuir mai, sé elementu hirak ne’e komete duni krime. “Ba PNTL laiha toleránsia. Sé nia komete sala ida-ne’e beibeik, nia simu kedas prosesu,” Júlio realsa.

Komisariu Julio Hornay rekuñese kazu iha Laulara no Ainaro, maibé ne’e kazu individu , la’ós instituisaun PNTL maka orienta. (jornalista: Xisto Freitas; editora: Rita Almeida)