Kontra Asédiu Seksuál, UN Woman Organiza Marsa

DILI, (ANTIL) – UN Woman hamutuk ho ninia parseiru sira, organiza marsa hahú hosi Tiger Fuels Mandarin to’o Jardim 5 de Maiu Kolmera, komesa tuku 16.00 to’o remata hodi hatan ba insidente asédiu seksuál iha Dili.

”Ita presiza atu tau atensaun ba seguransa públika, feto, labarik sira, ema ho dezabilidade, transjéneru no mós grupu vulnerável sira seluk, nune’e sira bele halo movimentu iha sidade laran laiha sentimentu ta’uk no iha ameasa seksuál ba sira-án”, Prezidenti Board Rede Feto, Judite Ximenes hatete liu-hosi komunikadu ne’ebé ANTIL asesu hosi UN Women, Kinta, (25/8).

Objetivu hosi marsa ne’e atu promove “Dili ne’ebé Seguru”, no hasa’e koñesimentu kona-bá problema boot asédiu ne’ebé mak dala barak sofre hosi feto no grupu vulnerável sira. Partisipante marsa sei uza roupa koor sabraka, hosi ki’ik to’o boot, inklui jéneru hotu.

Tuir nia, asuntu ne’e sai hanesan sentru ba sosiedade ida ne’ebé mak justa no inkluzivu. Entaun, marsa ida-ne’e importante tebes ba membru Rede Feto nian, tanba bainhira la-hatan ba violénsia hasoru feto sira, sei nunka atinji mundu ida ne’ebé justu.

Eventu ne’e organiza hosi UN Women, Rede Feto, CODIVA, Hatutan, Asosiasaun Mane Kontra Violensia, NGO Patria, FOKUPERS, ALOLA, PRADET, Fundasaun Ázia, no hetan suporta husi Embaixada Australia, Embaixada Estadus Unidos no Uniaun Europeia, Ajénsia ONU nian hanesan UNFPA, Komisaun Direitus Umanus ONU, Klinika Bairro Pite no grupu sira seluk tan.

Eventu ne’e hanesan parte ida hosi eventu balun, ne’ebé mak sei organiza hanesan parte ida hosi Kampaña Loron 16 hodi hapara Violensia Kontra Feto no Violénsia Bazeia ba Jéneru,  ne’ebé kada tinan selebra iha loron 25 Novembru to’o 10 Dezembru. Kampaña ne’e atu bele lori mundansa globál. (jornalista: Rita Almeida)