Madalena Hanjam: Ha’u Nia Edukasaun La’ós Trai Povu

DILI, (ANTIL) – Arguida ba kazu projetu sosa kama ba Hospitál Nasionál Guido Valadares (HNGV), eis Vise Ministra Saúde, Madalena Hanjam hatete, ninia edukasaun la’ós atu trai povu no nasaun hodi fó projetu ba ema nia kaben.

”Maibé atu trai povu ida ne’e hodi fó osan ba ema ida nia kaben no família ne’e la’ós ha’u nian edukasaun”, hatete Madalena Hanjam iha ninia deklarasaun ikus ba tribunál ne’ebé asiste hosi família no kolega ho mata ben iha Tribunál Distritál Dili, Kinta, (22/9).

Nia dehan, nu’udar enfermeira tinan ida no sai profesora desde 1987, oinsá hanorin enfermeira no parteira sira atu servi ema moras no salva ema nia vida. “Ha’u nia profisaun halo  juramentu atu salva ema nia vida, la’ós fali servi povu ki’ak ida ne’e hodi halo riku fali ema seluk nia kaben”, katak tan.

Eis Primeiru Ministru, Kay Rala Xanana Gusmão konvida nia sai membru governu la’ós hosi partidu maibé nu’udar ema professionál. Ho ida ne’e, durante tinan lima servi estadu, lakohi atu lakon tempu hodi servi povu no estadu ida ne’e.

Arguida mos informa dehan, antes ne’e nu’udar Vise Prezidenti ba Asembleia Mundiál Saúde hodi lidera Sudeste Aziatiku, bainhira hakarak riku, riku hosi fatin ne’eba, la’ós fali atu trai povu no nasaun ida ne’e.

Relasiona ho kazu ne’e, ba tribunál nia konfesa, durante fulan tolu ninia parte husu opiniaun hosi tekniku sira iha ministériu saúde atu oinsá rejeita proposta ida ne’e, maibé to’o ikus hanoin ida ne’e la-mosu.

Nia mos halo konsultasaun ho konselleiru kona-ba prosesu legál, maibé konselleiru nain rua mak fó hanoin katak, prosesu ne’e legál no koletivu.

Tanba ne’e, tribunál nia oin, nia konfesa, respeita tebtebes justisa Timor nian no orgullu haree ba prosesu ne’e tanba, Timor-oan sira mak julga malu.

Ho lia-fuan ikus nia husu atu tesi kazu ne’e tuir lei ho justu, hodi hatutan ba tribunál katak sei toma responsabilidade nu’udar fen ba laen kaben nomos inan ba oan nain haat.

Nia mos informa, kada fulan simu $6000.00 hosi governu liu-hosi Ministériu Negosiu Estranjeiru no Koperasaun nomos kada fulan hetan pursentu 10 hosi Uniaun Eropeia ba valór $6000.00.

Arguida Madalena Hanjam no Emília Pires durante prosesu julgamentu hili direitu nonok hodi lakohi ko’alia ba tribunál.

Mesmu nune’e, molok tribunál fó sai leitura finál, arguida sira iha direitu tuir kodigu prosesu penál artigu 60 ne’ebé ko’alia kona-ba arguidu nia direitu, alinea c esplika, atu, ho liberdade, fó ka la fó deklarasaun, konforme nia hakarak, no halo, ka husu atu halo, deklarasaun, iha kualkér altura durante inkéritu ka audiénsia julgamentu, salvu artigu 61, alínea a) nia dispozisaun; atu, iha interrogatóriu, fó elementu kona-bá nia identifikasaun, no, salvu kuandu iha audiénsia-julgamentu, fó informasaun kompleta no loos kona-bá nia antesedente kriminál.

Halakon Totál

Audénsia julgamentu ho ajenda alegasaun finál hosi parte advogadu tantu ekipa legál hosi Emília Pires hanesan Frederico Bettencourt Ferreira ho Pedro Camões no Madalena Hanjam mak Nuno Morais Sarmento ho José Guterres husu ba tribunál atu halakon totál kastigu tinan 10 nomos multa ne’ebé ministériu públiku akuza iha alegasaun ikus nian.

Defeza finál advogadu arguida Emília Pires iha Tribunál Distritál Dili, Kinta, (22/9), konsidera deklarasaun sasin sira ne’ebé aprejenta mesak aprovadu laiha baze fundamentu tanba, sasin eis Primeiru Ministru, Mari Alkatiri Xanana Gusmão katak, ministériu finansas iha kompeténsia no halo tuir lei.

“La’ós ministériu finansas mak fó projetu no asina kontratu, no la aprova prosesu aprovizionamentu ho absolutamente, imposivel Emília Pires viola lei”, argumentu advogadu arguida eis Ministra Finansas, Bettencourt Ferreira.

Nia hatutan, fundus kontijénsia ne’e la’ós ministériu finansas mak aprova maibé tuir lei Primeiru Ministru, Xanana Gusmão mak aprova fundus kontijénsia la’ós ministra Emília Pires.

Defeza ne’e mos mensiona peritu internasionál ne’ebé presta deklarasaun antes ne’e katak, kama sira ne’ebé sosa ho kualidade no folin baratu. Tanba ne’e, husu ba tribunál labele simu presaun hosi públiku mais oinsá aplika lei ho justu. Hirak ne’e hotu, nu’udar advogadu konsidera hodi afirma, alegasaun ministériu públiku la fundamentu.

Ministériu Públiku akuza arguida sira ho kódigu penál ho artigu 274 ne’ebé ko’alia kona-ba administrasaun danoza, alinea 1 esplika, ne’ebé, kuandu iha obrigasaun atu fó-destinu ka administra ema-seluk nia interese, servisu ka bem patrimoniál, maski nia mós sosiedade ka pesoa koletiva ne’ebé soi interese, servisu ka bem sira-ne’e nia sósiu, hamosu prejuizu patrimoniál signifikativu ekonomikamente tanba nia viola intensionalmente regra kona-ba kontrole ka jestaun ka aktua ho violasaun grave ba devér kona-ba nia funsaun, sei hetan pena prizaun tinan 1 to’o tinan 4.

Alinea 2 hatete, bem, interese ka servisu referidu iha númeru anteriór estadu, pessoa koletiva ho utilidade públika, kooperativa ka asosiasaun populár nian karik, ajente sei hetan pena prizaun tinan 2 to’o tinan 6.

Aliena 3 hatutan, pena sira-ne’e sei aplika mós ba ema ne’ebé halo ninian ka husik ema-seluk halo ninian, ilejitimamente, koiza ne’ebé nia bele fó-destinu tuir de’it finalidade ne’ebé ema ne’ebé administra ema-seluk nia patrimóniu tenke tuir.

Artigu 299 ko’alia kona-ba partisipasaun ekonomia, alinea 1 hatete, funsionáriu ne’ebé tenke intervein iha kontratu ka operasaun ka aktividade seluk, tanba kargu públiku ne’ebé nia kaer, no aproveita kondisaun ne’e atu hetan ba nia ka ba ema-seluk, diretamente ka hodi ema-seluk, vantajen patrimoniál ka, oin naran ida, partisipasaun ekonómika ilísita, no, nune’e, hamosu prejuizu ba interese públiku ne’ebé nia tenke administra, fiskaliza, defende ka realiza, sei hetan pena prizaun tinan 2 to’o tinan 8.

Alinea 2 hatutan, kuandu konduta ne’e hamosu ba Estadu prejuizu aas-liu dolar amerikanu 10.000 sei aplika pena prizaun tinan 3 to’o tinan 15.

Kazu ne’e prezide hosi juiz prezidenti José Maria Araújo ho membru Francisca Cabral no Maria Solano. Ministériu Públiku reprejenta prokuradór Angelina Saldanha, Jacinto Babo no Lídia Soares.

Hafoin rona alegasaun to’o tuku 20.30, no rona deklarasaun ikus hosi arguida Vise Ministra Saúde, Madalena Hanjam, tribunál marka fali audénsia ba loron Sesta, (21/10) tuku 11.00 hodi rona mos deklarasaun ikus hosi eis Ministra Finansas, Emília Pires tuir kodigu prosesu penál hatete tanba, advogadu labele reprejenta arguida. (jornalista: Rita Almeida)

Foto: (1) Família no kolega arguida eis Vise Ministra Saúde, Madalena Hanjam hato'o sentimentu solidaridade hafoin julgamentu iha Tribunál Distritál Dili, Kinta, (22/9). Foto ANTIL/Rita Almeida (2) Arguida eis Vise Ministra Saúde, Madalena Hanjam. Foto ANTIL/Antonio Goncalves