segunda-feira, 13 de fevereiro de 2017

Atende 24 Horas, Públiku La Aproveita Diak Sentru Saúde

PARTILHAR

DÍLI (ANTIL) – Estabelesementu Sentru Saúde ho nia atendementu 24 Horas durante ne’e menus, tamba komunidade sira la aproveita funsaun fasilidade saúde ne’ebe governu hari’i ne’e ho didiak.

Iha vizita servisu Primeiru Ministru (PM) Rui Maria de Araújo ba Sentru Saúde Formosa Dili, xefi governu ne’e kestiona ho komunidade sira ne’ebe durante ne’e la hare’e didiak funsaun hosi Sentru Saúde nian ne’e rasik.

“Sentru Saúde atende 24 horas, maibé públiku la mai utiliza, iha infremeiru no médiku, maibé públiku la mai konsulta, sira ba fali iha ospital bo’ot sira,” tenik PM Rui ba Jornalista sira, Segunda (13/02/2017), iha ninian vizita ne’ebe akompan hosi Vise Ministra Saúde, Ana Isabel Soares.

Durante ne’e, tuir nia observasaun, komunidade sira wainhira hetan moras ruma sempre deretamente ba ospital bo’ot. “Ospitál bo’ot nia funsaun ne’e atu fó atendementu ba servisu sira ne’ebé Sentro Saúde la konsege atende”.

Tuir nia, governu investe iha setor saude liu hosi Sentru Saude ho objektivu atu fo atendementu ne’ebe diak ba komunidade sira. Tamba ne’e, se komunidae la aproveita didiak fasilidae saude ne’e, entaun hanesan klinika privada karik, wainhira nia investe mediku hanesan dotor, enfermeira no parteira, maibe laiha vizita hosi pasiente, signfika se-laiha valor.

Iha Sentru Saúde Formosa, kada loron iha mediku 1, enfermeira ida no parteira nain 2 mak stand by, hosi relatoriu vizitante lor-loron nian, kada loron iha pasiente deit nain 7.  “Sei klínika privada ida mak nia tau ema servisu nain 4 no ema ne’ebé mai nain 7, la to’o fulan klínika ne’e bankrota ona, hanesan mós estadu,” dehan PM Rui.

Ho menus vizita pasiente nian ba Sentru Saúde, eis Ministru Saúde iha Primeiru Governu Konstitusional ne’e husu atu komunidade hakbesik an liu tan ba fasilidade saude ne’e, nune’e bele hetan informasaun barak liu tan, inklui ba funsaun fasilidade saúde nian ne’e. (Jornalista: Julia Chatarina / Editor: Gantry Meilana)

Foto: Primeiru Ministru (PM) Rui Maria de Araújo akompanha ho Vice Ministra Saúde Ana Isabel Soares halo fiskalizasaun iha Centro Saúde Formosa, Segunda (13/02). Foto ANTIL: Julia Chatarina
PARTILHAR

Author: verified_user

Publicação luso-timorense sem fins lucrativos

0 comentários: